RBI: భారతీయ రిజర్వ్ బ్యాంక్ (RBI) వడ్డీ రేట్లపై తాజా నిర్ణయం ప్రకటించింది. మానీటరీ పాలసీ కమిటీ (MPC) సమావేశం ముగిసిన అనంతరం గవర్నర్ సంజయ్ మల్హోత్రా మీడియాకు వెల్లడించారు. ఇందులో భాగంగా రెపో రేటును 5.5 శాతం వద్దే కొనసాగించనున్నట్లు తెలిపారు. వరుసగా రెండోసారి వడ్డీ రేట్లలో ఎలాంటి మార్పులు చేయకుండా యథాతథంగా కొనసాగించడం విశేషం. ఈ నిర్ణయం వల్ల సాధారణ ప్రజలు చెల్లించే ఇఎంఐలలో ఎలాంటి మార్పులు ఉండవు. గృహ రుణాలు, వాహన రుణాలు, వ్యక్తిగత రుణాలపై భారం తగ్గకపోయినా, పెరగకపోవడం వినియోగదారులకు కొంత ఊరట కలిగిస్తోంది.
ఈ ఏడాది ఫిబ్రవరి, ఏప్రిల్ నెలల్లో RBI 0.25 శాతం చొప్పున రెపో రేటు తగ్గించింది. జూన్‌లో మాత్రం మరింత పెద్ద నిర్ణయం తీసుకుని 50 బేసిస్ పాయింట్లు తగ్గించింది. మొత్తంగా మూడు వరుస సమావేశాల్లో 1 శాతం మేర తగ్గింపు జరిగింది. అయితే ఆ తర్వాతి ఆగస్టు, అక్టోబర్ సమావేశాల్లో రేట్లను యథాతథంగా కొనసాగించింది.
ఈసారి సమావేశంలో RBI 2025-26 ఆర్థిక సంవత్సరానికి జీడీపీ వృద్ధి అంచనాలను 6.5 శాతం నుంచి 6.8 శాతానికి పెంచింది.
* రెండో త్రైమాసికం (Q2)లో 6.7% నుంచి 7%కి పెంచింది.
* మూడో త్రైమాసికం (Q3)లో 6.6% నుంచి 6.4%కి తగ్గించింది.
* నాలుగో త్రైమాసికం (Q4)లో 6.3% నుంచి 6.2%కి తగ్గించింది.
* ఇక 2026-27 ఆర్థిక సంవత్సరం మొదటి త్రైమాసికంలో 6.6% నుంచి 6.4%కి తగ్గించింది.
ఎస్‌బీఐ తాజా నివేదిక ప్రకారం, 2026-27లో సీపీఐ ఆధారిత ద్రవ్యోల్బణం 4 శాతం లేదా అంతకంటే తక్కువ స్థాయిలో ఉండే అవకాశముందని అంచనా వేసింది. జీఎస్టీ హేతుబద్ధీకరణ కారణంగా అక్టోబర్‌లో అది మరింత తక్కువగా ఉండొచ్చని పేర్కొంది. ఈ నేపథ్యంలో కొంతమంది విశ్లేషకులు RBI మళ్లీ వడ్డీ రేట్లను 25 బేసిస్ పాయింట్లు తగ్గిస్తుందని భావించినా, అంచనాలకు విరుద్ధంగా యథాతథంగా కొనసాగించడమే జరిగింది. మొత్తంగా, RBI నిర్ణయం ప్రకారం రెపో రేటు 5.5% వద్ద యథాతథంగా కొనసాగుతుంది. దేశ ఆర్థిక పరిస్థితులను దృష్టిలో ఉంచుకుని తీసుకున్న ఈ నిర్ణయం వినియోగదారులకు స్థిరత్వాన్ని ఇస్తుందని నిపుణులు చెబుతున్నారు.