MLC Kavitha: మాజీ ముఖ్యమంత్రి కేసీఆర్ కుమార్తె, బీఆర్ఎస్ ఎమ్మెల్సీ కవిత చేసిన సంచలన వ్యాఖ్యలు పార్టీలో పెను ప్రకంపనలు సృష్టిస్తున్నాయి. ఈ వ్యాఖ్యల నేపథ్యంలో ఆమెపై పార్టీ కఠిన చర్యలు తీసుకునే అవకాశం ఉందని రాజకీయ వర్గాల్లో చర్చ జరుగుతోంది.
పార్టీలో కవితకు వ్యతిరేకంగా చర్యలు :
కవిత వ్యాఖ్యల ప్రభావం పార్టీపై స్పష్టంగా కనిపిస్తోంది. ఇప్పటికే బీఆర్ఎస్ అధికారిక వాట్సాప్ గ్రూపుల నుంచి కవిత పీఆర్వోను తొలగించారు. ఇది పార్టీలో ఆమెకు ప్రాధాన్యత తగ్గుతోందనడానికి సంకేతంగా భావిస్తున్నారు. అంతేకాకుండా, పలువురు బీఆర్ఎస్ నేతలు, కార్యకర్తలు సోషల్ మీడియా ప్లాట్‌ఫామ్స్ అయిన ఎక్స్ (ట్విట్టర్), ఇన్‌స్టాగ్రామ్, ఫేస్‌బుక్లలో కవితను అన్‌ఫాలో (Unfollow) చేస్తున్నారు. కవిత వ్యాఖ్యలకు కౌంటర్‌గా, బీఆర్ఎస్ సోషల్ మీడియాలో మాజీ మంత్రి హరీష్ రావును పొగుడుతూ ‘ఆరడుగుల బుల్లెట్’ అంటూ ట్వీట్ చేయడం కూడా ఈ అంతర్గత విభేదాలకు నిదర్శనంగా నిలిచింది.
కేసీఆర్ ఫాంహౌస్‌లో కీలక సమావేశం :
కవిత వ్యాఖ్యలు చేసిన వెంటనే, పార్టీ అధినేత కేసీఆర్ ఫాంహౌస్‌లో బీఆర్ఎస్ ముఖ్య నేతలతో సమావేశమైనట్లు సమాచారం. ఈ సమావేశంలో కేటీఆర్, మధుసూదనాచారీ, వేముల ప్రశాంత్ రెడ్డి, జగదీష్ రెడ్డి, పల్లా రాజేశ్వరరెడ్డి వంటి కీలక నాయకులు పాల్గొన్నారు. కవిత వ్యాఖ్యలపై పార్టీలో ఎలాంటి చర్యలు తీసుకోవాలనే దానిపై కేసీఆర్ వారితో చర్చిస్తున్నారని తెలుస్తోంది.
Also Read: Kavita: కాలేశ్వరం కుంగడానికి హరీష్ రావే కారణం
కవిత చేసిన ఆరోపణల నేపథ్యంలో ఆమెను పార్టీ నుంచి సస్పెండ్ చేసే అవకాశం ఉందని బీఆర్ఎస్ వర్గాల నుంచి గుసగుసలు వినిపిస్తున్నాయి. ఆమె చేసిన వ్యాఖ్యలు పార్టీ ప్రతిష్టను దెబ్బతీశాయని, రాబోయే స్థానిక సంస్థల ఎన్నికలపై ప్రభావం చూపుతాయని పార్టీ నాయకులు ఆందోళన వ్యక్తం చేస్తున్నారు. పార్టీపై వ్యతిరేకంగా పనిచేస్తున్న వారికి ఇది ఒక ఉదాహరణ అవుతుందని, అందువల్ల కవితపై కఠిన చర్యలు తీసుకోవచ్చని రాజకీయ విశ్లేషకులు అభిప్రాయపడుతున్నారు.
ఈ పరిణామాల మధ్య కవిత కొత్త పార్టీ పెట్టే ఆలోచనలో ఉన్నట్లు మరో కోణం వెలుగులోకి వచ్చింది. ఇప్పటికే ఆమె కొత్త పార్టీ కోసం రిజిస్ట్రేషన్ కూడా చేయించారన్న వార్తలు ప్రచారంలో ఉన్నాయి. ఒకవేళ బీఆర్ఎస్ ఆమెను పార్టీ నుంచి సస్పెండ్ చేస్తే, ఆమె వెంటనే కొత్త పార్టీని ప్రకటించే అవకాశం ఉందని సమాచారం. గతంలో కూడా కవిత కొత్త పార్టీ పెడతారన్న ఊహాగానాలు వచ్చినా, అవి కార్యరూపం దాల్చలేదు. అయితే తాజా పరిస్థితులు ఆమెను ఈ నిర్ణయం వైపు ప్రేరేపించవచ్చని భావిస్తున్నారు. ఈ వ్యవహారంపై బీఆర్ఎస్ ఎలాంటి ముగింపు ఇస్తుందో చూడాలి.