Chiranjeevi: టాలీవుడ్ మెగాస్టార్ చిరంజీవి మరోసారి తన రాజకీయ భవిష్యత్తుపై క్లారిటీ ఇచ్చారు. ఇటీవల జరిగిన “బ్రహ్మా ఆనందం” సినీ ఈవెంట్‌లో పాల్గొన్న ఆయన, తాను ఇకపై పూర్తిగా సినిమా రంగానికే అంకితమవుతానని స్పష్టం చేశారు. రాజకీయాల గురించి ఎలాంటి ఆశలూ పెట్టుకోకూడదని, తన జీవితం మొత్తం కళామతల్లి సేవకే అంకితం అవుతుందని వెల్లడించారు.
రాజకీయాలకు శాశ్వతంగా గుడ్‌బై
చిరంజీవి 2008లో ప్రజారాజ్యం పార్టీని స్థాపించి, 2009 ఎన్నికల్లో పోటీ చేసి, ఆ తర్వాత 2011లో కాంగ్రెస్ పార్టీలో విలీనం చేశారు. కేంద్ర మంత్రిగా కూడా పనిచేసిన ఆయన, 2014 ఎన్నికల అనంతరం రాజకీయాలకు దూరమయ్యారు. అప్పటి నుంచీ రాజకీయ రీ-ఎంట్రీపై ఎన్నో ఊహాగానాలు వచ్చాయి. వాటిని మరోసారి ఖండించిన చిరంజీవి, “ఇక జీవితాంతం రాజకీయాలకు దూరంగా ఉంటాను” అని స్పష్టంగా ప్రకటించారు.
పెద్దలను కలవడం రాజకీయ కారణాల కోసం కాదు
చిరంజీవి మాట్లాడుతూ, “పెద్దలను కలవడాన్ని రాజకీయాలకు అన్వయించాల్సిన అవసరం లేదు. సినిమా పరిశ్రమకు అవసరమైన సహాయం కోసం కలుస్తున్నాను. ఇది రాజకీయ ప్రయోజనాల కోసం కాదని మరొక్కసారి చెబుతున్నాను” అన్నారు.
సేవా లక్ష్యాలను పవన్ నెరవేర్చుతారు
తాను ఇకపై సినిమాలతో పాటు సేవా కార్యక్రమాలు చేపడతానని, తన ఆశయాలను, లక్ష్యాలను పవన్ కళ్యాణ్ నెరవేర్చుతారని చిరంజీవి ఆశాభావం వ్యక్తం చేశారు. ఆయన మాటలు పవన్ కల్యాణ్ రాజకీయ ప్రయాణంపై మరింత ఆసక్తిని పెంచాయి.
ఈ వ్యాఖ్యలతో చిరంజీవి తన రాజకీయ భవిష్యత్తుపై ఎలాంటి సందేహాలకు ఆస్కారం లేకుండా స్పష్టత ఇచ్చారు. ఇకపై ఆయనను పూర్తిగా సినిమాల పైనే ఫోకస్ చేస్తారని అభిమానులు ఆశాభావం వ్యక్తంచేస్తున్నారు.