TVK Vijay: తమిళ రాజకీయాల్లో సరికొత్త అధ్యాయం మొదలవుతోంది. టీవీకే అధినేత విజయ్ ముఖ్యమంత్రిగా బాధ్యతలు చేపట్టేందుకు ముహూర్తం ఖరారైంది. ఈ చారిత్రాత్మక ఘట్టానికి దేశ రాజధాని నుంచి కీలక నేతలు హాజరవుతుండటం ఇప్పుడు రాజకీయ వర్గాల్లో హాట్ టాపిక్ గా మారింది.
రేపే విజయ్ ప్రమాణ స్వీకారం
తమిళనాడు 14వ ముఖ్యమంత్రిగా విజయ్ రేపు (మే 7, గురువారం) ఉదయం 11 గంటలకు పదవీ బాధ్యతలు స్వీకరించనున్నారు. చెన్నైలోని నెహ్రూ ఇండోర్ స్టేడియం ఈ వేడుకకు వేదిక కానుంది. విజయ్తో పాటు మరో 21 మంది మంత్రులుగా ప్రమాణం చేయబోతున్నారు. ఇప్పటికే స్టేడియం పరిసరాల్లో భారీ ఏర్పాట్లు పూర్తి చేశారు. తమ అభిమాన నటుడు సీఎంగా బాధ్యతలు చేపట్టనుండటంతో తమిళనాట పండుగ వాతావరణం నెలకొంది.
ముఖ్య అతిథులుగా రాహుల్, ఖర్గే
ఈ కార్యక్రమానికి జాతీయ స్థాయి ప్రాధాన్యత లభిస్తోంది. కాంగ్రెస్ అగ్రనేత రాహుల్ గాంధీ, ఆ పార్టీ జాతీయ అధ్యక్షుడు మల్లికార్జున ఖర్గే ఈ వేడుకకు హాజరుకానున్నట్లు సమాచారం. విజయ్ స్వయంగా రాహుల్ గాంధీకి ఆహ్వానం పంపారని, దానికి ఆయన సానుకూలంగా స్పందించారని తెలుస్తోంది. టీవీకే ప్రభుత్వానికి కాంగ్రెస్ మద్దతు ప్రకటించిన నేపథ్యంలో, వీరి రాక రాజకీయంగా ప్రాధాన్యత సంతరించుకుంది.
బల నిరూపణకు కాంగ్రెస్ మద్దతు
తమిళనాడులో ప్రభుత్వం ఏర్పాటు చేయడానికి 118 మంది ఎమ్మెల్యేల మద్దతు అవసరం. అయితే విజయ్ నేతృత్వంలోని టీవీకే పార్టీకి సొంతంగా 108 సీట్లు ఉన్నాయి. మరో 10 మంది ఎమ్మెల్యేల మద్దతు కోసం విజయ్ ప్రయత్నించగా, కాంగ్రెస్ పార్టీ ముందుకు వచ్చింది. కాంగ్రెస్ పార్టీకి ఉన్న ఐదుగురు ఎమ్మెల్యేలు విజయ్కు మద్దతు ఇస్తున్నట్లు రాహుల్ గాంధీ అధికారికంగా లేఖ ఇచ్చారు. ఈ మేరకు తమిళనాడు కాంగ్రెస్ నేతలు టీవీకే కార్యాలయానికి వెళ్లి ఆ లేఖను విజయ్కు స్వయంగా అందజేశారు.
స్వయంగా మాట్లాడుకున్న నేతలు
మద్దతు విషయంపై రాహుల్ గాంధీ, విజయ్ ఫోన్లో చర్చించుకున్నట్లు తెలుస్తోంది. తమిళనాడు కాంగ్రెస్ నేతల విజ్ఞప్తి మేరకు రాహుల్ గ్రీన్ సిగ్నల్ ఇవ్వడంతో టీవీకే ప్రభుత్వ ఏర్పాటుకు మార్గం సుగమమైంది. కాంగ్రెస్ మద్దతు తెలపడంపై విజయ్ హర్షం వ్యక్తం చేస్తూ ఆ పార్టీకి ధన్యవాదాలు తెలిపారు. మొత్తానికి విజయ్ ప్రమాణ స్వీకారంతో తమిళ రాజకీయాల్లో ఒక కొత్త కూటమి శకం ప్రారంభం కాబోతోంది.