Surya: బాక్సాఫీస్ దగ్గర హిట్లు పడటం వేరు.. ఏకంగా చరిత్ర సృష్టించడం వేరు! గత కొన్నేళ్లుగా సరైన థియేట్రికల్ బ్లాక్‌బస్టర్ లేక సైలెంట్‌గా ఉన్న కోలీవుడ్ స్టార్ హీరో సూర్య.. బాక్సాఫీస్‌పై అలాంటి రీసౌండింగ్ కమ్‌బ్యాక్ ఇచ్చారు. ఒకే క్యాలెండర్ ఇయర్‌లో బ్యాక్ టు బ్యాక్ మూడు సినిమాలతో ₹200 కోట్ల గ్రాస్ కొల్లగొట్టిన ఏకైక సౌత్ ఇండియన్ హీరోగా సూర్య సరికొత్త చరిత్ర సృష్టించారు. ఇప్పటివరకు ఇండియన్ సినిమాలో కేవలం బాలీవుడ్ బాద్‌షా షారుఖ్ ఖాన్, ఖిలాడీ అక్షయ్ కుమార్‌లకు మాత్రమే సాధ్యమైన ఈ అరుదైన ఫీట్‌ను అందుకుని ట్రేడ్ పండితులను సైతం ముక్కున వేలేసుకునేలా చేశారు.
ఫ్లాపుల నుంచి ఫీనిక్స్‌లా.. కంగువ షాక్ తర్వాత సాలిడ్ కమ్‌బ్యాక్..
తెలుగులో ‘గజిని’ సినిమాతో మొదలుపెట్టి ‘సింగం’, ‘సూర్య సన్నాఫ్ కృష్ణన్’, ‘7th సెన్స్’ లాంటి సినిమాలతో ఇక్కడి మన స్టార్ హీరోలకు సమానంగా ఫ్యాన్ బేస్ సంపాదించుకున్న సూర్యకు గత కొన్నేళ్లుగా కాలం పెద్దగా కలిసిరాలేదు.
‘ఆకాశం నీ హద్దురా’, ‘జై భీమ్’ లాంటి కల్ట్ క్లాసిక్స్ ప్రశంసలు తెచ్చినా అవి నేరుగా ఓటీటీలోనే రిలీజ్ అయ్యాయి. ఇక భారీ అంచనాలతో పాన్ ఇండియా రేంజ్‌లో వచ్చిన పీరియాడిక్ యాక్షన్ ఫిల్మ్ ‘కంగువా’పై రూ. 2000 కోట్ల కలెక్షన్లు అంటూ హైప్ క్రియేట్ చేసినా, థియేటర్ల వద్ద బొక్కబోర్లా పడింది. ఆ తర్వాత వచ్చిన ‘రెట్రో’కి మంచి టాక్ వచ్చినా కమర్షియల్‌గా అనుకున్న ఫలితాన్ని అందుకోలేకపోయింది. దీంతో థియేట్రికల్ బాక్సాఫీస్ వద్ద తన సత్తా నిరూపించుకోవాల్సిన టైమ్‌లో 2026లోకి ఎంట్రీ ఇచ్చిన సూర్య.. ఏకంగా మూడు వరుస బ్లాక్‌బస్టర్లతో అగ్గి రాజేశారు.
2026లో సూర్య హ్యాట్రిక్ తుఫాన్ – సినిమా కలెక్షన్ల లెక్కలివే..
సూర్య వేర్వేరు భాషల డైరెక్టర్లతో చేసిన ప్రయోగాలు ఈ ఏడాది బాక్సాఫీస్‌ను షేక్ చేశాయి..
1. కరుప్పు (వీరభద్ర):
ఆర్జే బాలాజీ దర్శకత్వంలో త్రిష హీరోయిన్‌గా మే 15న వచ్చిన ఈ సినిమా బాక్సాఫీస్ వద్ద రికార్డులు తిరగరాసింది. ప్రపంచవ్యాప్తంగా ఏకంగా రూ. 350 కోట్లకు పైగా గ్రాస్ వసూళ్లను సాధించి సూర్యకు గ్రాండ్ కమ్‌బ్యాక్ అందించింది.
2. విశ్వనాథ్ అండ్ సన్స్:
టాలీవుడ్ డైరెక్టర్ వెంకీ అట్లూరి దర్శకత్వంలో సూర్య, మమితా బైజు జంటగా ప్రముఖ నిర్మాత నాగవంశీ నిర్మించిన ఈ ఎమోషనల్ ఫ్యామిలీ డ్రామా ఆగస్టు 14న విడుదలైంది. అన్ని వర్గాల ప్రేక్షకులను కట్టిపడేసిన ఈ చిత్రం ఏకంగా రూ. 200 కోట్లకు పైగా వసూళ్లు రాబట్టి సూర్య ఖాతాలో వరుసగా రెండో భారీ హిట్‌గా నిలిచింది.
3. సీన్ (Scene):
మలయాళ హిట్ డైరెక్టర్ జితు మాధవన్ దర్శకత్వంలో నజ్రియా నజీమ్, నస్లెన్ కీలక పాత్రల్లో తెరకెక్కిన ‘సీన్’ నవంబర్ 6న రిలీజైంది. కేవలం ఐదు రోజుల్లోనే రూ. 175 కోట్లకు పైగా కొల్లగొట్టి ఇప్పటికే బ్రేక్ ఈవెన్ సాధించగా, ప్రస్తుతం రూ. 200 కోట్ల క్లబ్‌ను దాటేసింది. పోటీగా తమిళంలో పెద్ద సినిమాలేవీ లేకపోవడంతో ఈ మూవీ ఫుల్ రన్‌లో రూ. 250 నుంచి రూ. 300 కోట్ల మార్కును టచ్ చేసే అవకాశం ఉందని ట్రేడ్ వర్గాలు చెబుతున్నాయి.
అక్షయ్, షారుఖ్ సరసన సూర్య..
ఇండియన్ సినిమా చరిత్రలో ఒకే ఏడాది మూడు ₹200 కోట్ల సినిమాలు ఇచ్చిన రికార్డు ఇప్పటివరకు ఇద్దరి పేరిటే ఉండేది.
అక్షయ్ కుమార్ (2019): మిషన్ మంగళ్, హౌస్‌ఫుల్ 4, గుడ్ న్యూస్ చిత్రాలతో ఈ ఘనత సాధించారు.
షారుఖ్ ఖాన్ (2023): పఠాన్, జవాన్, డంకీ చిత్రాలతో వరుసగా బాక్సాఫీస్‌ను షేక్ చేశారు.
సూర్య (2026): ఇప్పుడు కరుప్పు, విశ్వనాథ్ అండ్ సన్స్, సీన్ చిత్రాలతో ఒకే సంవత్సరంలో హ్యాట్రిక్ ₹200 కోట్ల గ్రాసర్లు కొట్టి ఈ ఘనత సాధించిన మొట్టమొదటి సౌత్ ఇండియన్ హీరోగా రికార్డు సృష్టించారు.