Russia Earthquake: నెల రోజుల వ్యవధిలో రష్యాలోని కమ్చట్కా ద్వీపకల్పం మరోసారి భారీ భూకంపంతో వణికిపోయింది. శనివారం నాటి భూకంపం రిక్టర్ స్కేల్‌పై 7.1 తీవ్రతతో నమోదైనట్టు జర్మన్ రీసెర్చ్ సెంటర్ ఫర్ జియో సైన్సెస్ (GFZ) ప్రకటించింది. ఈ సంస్థ ప్రకారం, భూకంప కేంద్రం భూమికి 10 కిలోమీటర్ల లోతులో ఉంది. అయితే, యూ.ఎస్. జియోలాజికల్ సర్వే (USGS) ప్రకారం, భూకంప తీవ్రత 7.4గా, కేంద్రం 39.5 కిలోమీటర్ల లోతులో ఉన్నట్టు పేర్కొంది.
గత నెలలో కూడా ఇదే ప్రాంతంలో 8.7 తీవ్రతతో ఒక భారీ భూకంపం సంభవించి, సునామీకి దారితీసింది. ఇప్పుడు మళ్ళీ అదే చోట భూకంపం రావడంతో స్థానిక ప్రజలు భయాందోళనలకు గురయ్యారు. తాజా భూకంపం కారణంగా పసిఫిక్ సునామీ హెచ్చరిక కేంద్రం సునామీ వచ్చే అవకాశం ఉందని హెచ్చరించింది. అయితే, కమ్చట్కాకు నైరుతి దిశలో ఉన్న జపాన్‌కు ఎటువంటి సునామీ హెచ్చరిక జారీ చేయలేదని జపాన్ వాతావరణ సంస్థ వెల్లడించింది.
Also Read: Erika Kirk: “ఆయన వారసత్వాన్ని కొనసాగిస్తా” – చార్లీ కిర్క్ భార్య ఎరికా కిర్క్
ప్రస్తుతానికి, ఈ భూకంపం వల్ల ఎలాంటి ప్రాణనష్టం లేదా ఆస్తి నష్టం జరిగినట్లు నివేదికలు అందలేదని అధికారులు తెలిపారు. జూలైలో 8.8 తీవ్రతతో సంభవించిన శక్తివంతమైన భూకంపం తరువాత పసిఫిక్ ప్రాంతం అంతటా సునామీ హెచ్చరికలు జారీ చేయబడ్డాయి. ఇప్పుడు మళ్ళీ ఇదే ప్రాంతంలో భూకంపం రావడం వల్ల భద్రతా చర్యలను అధికారులు కట్టుదిట్టం చేశారు.