Seethakka: ప్రజలకు సంక్షేమం, అభివృద్ధి అందించడమే తమ ప్రభుత్వ లక్ష్యమని తెలంగాణ మంత్రి సీతక్క స్పష్టం చేశారు. ఖమ్మం జిల్లా వైరా మున్సిపాలిటీలో పర్యటించిన సందర్భంగా ఆమె ఈ వ్యాఖ్యలు చేశారు.
‘కాంగ్రెస్ ప్రభుత్వాన్ని బదనాం చేసేందుకు ప్రయత్నాలు’
రాష్ట్రాన్ని అభివృద్ధి చేస్తున్న కాంగ్రెస్ ప్రభుత్వంపై భారత రాష్ట్ర సమితి (బీఆర్ఎస్) విమర్శలు చేస్తోందని మంత్రి సీతక్క ఆరోపించారు. యూరియా సరఫరా చేయాల్సింది కేంద్ర ప్రభుత్వమని, అయినా కూడా రైతులను తప్పుదోవ పట్టించేందుకు బీఆర్ఎస్ కాంగ్రెస్‌పై విమర్శలు చేస్తోందని ఆమె మండిపడ్డారు. గత ప్రభుత్వం రాష్ట్రాన్ని అప్పుల పాలు చేసిందని ఆమె విమర్శించారు.
‘ప్రజలకు పథకాలు అందిస్తున్నాం’
రాష్ట్రంలో భారీ వర్షాలకు దెబ్బతిన్న రోడ్లకు వెంటనే మరమ్మతులు చేయిస్తామని మంత్రి హామీ ఇచ్చారు. అర్హులైన పేదలందరికీ ఇందిరమ్మ ఇళ్లు, మహిళలకు సంక్షేమ పథకాలు అందిస్తున్నామని ఆమె తెలిపారు. అలాగే, 42 శాతం బీసీ రిజర్వేషన్ల అమలుకు కేంద్ర ప్రభుత్వం చొరవ చూపాలని కోరారు. స్థానిక ఎన్నికల నిర్వహణకు రాష్ట్ర ప్రభుత్వం చర్యలు చేపడుతోందని కూడా సీతక్క వెల్లడించారు.