Weather: ఈ సంవత్సరం నైరుతి రుతుపవనాలు (Southwest Monsoon) సకాలంలో ప్రవేశించనున్నాయని భారత వాతావరణ శాఖ తెలిపింది. ఇప్పటికే ఇవి అండమాన్-నికోబార్ తీరాన్ని తాకాయి. ప్రస్తుతం చురుకుగా కదులుతున్న ఈ రుతుపవనాలు, మే 27వ తేదీ నాటికి కేరళ తీరాన్ని తాకనున్నట్లు అంచనా వేస్తున్నారు.
ఇక తెలంగాణ రాష్ట్రానికి ఇవి జూన్ 12వ తేదీ నాటికి చేరుకుంటాయని సూచనలు ఉన్నాయి. వాతావరణ శాఖ అంచనాల ప్రకారం, ఈసారి తెలంగాణలో సాధారణం కంటే ఎక్కువ వర్షాలు పడే అవకాశాలు ఉన్నాయి. ఇది వ్యవసాయం, నీటి నిల్వలు మరియు భూగర్భ జలాల పరంగా శుభవార్తగా భావించవచ్చు.
మరోవైపు, ప్రస్తుతం రాష్ట్రంలో కొనసాగుతున్న అధిక ఉష్ణోగ్రతల ప్రభావం త్వరలోనే తగ్గుముఖం పట్టే అవకాశం ఉంది. రుతుపవనాల ప్రభావంతో మరో వారం రోజుల్లో ఈ వేడి తేట పడనుందని వాతావరణ శాఖ తెలిపింది.
ఈ పరిణామాలన్నీ రాష్ట్ర రైతులకు, ప్రజలకు ఉపశమనం కలిగించేలా ఉండనున్నాయి. రానున్న రోజుల్లో వర్షపాతం ఎలా ఉండబోతుందన్న విషయంపై విస్తృతంగా పరిశీలనలు కొనసాగుతున్నాయి.