Wasim Akram: వసీం అక్రమ్ భారత్-పాకిస్తాన్ క్రికెట్ భవిష్యత్తుపై తన అభిప్రాయాన్ని స్పష్టం చేశారు. టెస్ట్ క్రికెట్ పునఃప్రారంభం కావాలని, తద్వారా ఈ రెండు జట్ల మధ్య క్రికెట్ సంబంధాలు తిరిగి బలపడాలని ఆయన కోరుకున్నారు. రెండు జట్ల మధ్య టెస్ట్ మ్యాచ్‌లు జరగడం అత్యంత ముఖ్యమని ఆయన నొక్కి చెప్పారు. దీనిపై ఆయన చేసిన వ్యాఖ్యలు ఇప్పుడు క్రికెట్ వర్గాల్లో చర్చనీయాంశంగా మారాయి. “భారత్-పాకిస్తాన్ మధ్య టెస్ట్ సిరీస్‌లు జరగాలి. ఇది ఇరు దేశాల క్రికెట్ అభిమానులకు ఎంతో అవసరం. కేవలం ఐసీసీ టోర్నమెంట్ల కోసం మాత్రమే ఎదురుచూడటం సరికాదు. టీ20లు, వన్డేల కంటే టెస్ట్ క్రికెట్‌లోనే ఈ రెండు జట్ల మధ్య నిజమైన పోటీ కనిపిస్తుంది,” అని అక్రమ్ అన్నారు. ఈ సందర్భంగా ఆయన పాత సిరీస్‌లను గుర్తుచేసుకున్నారు. 1980లు, 1990లలో భారత్-పాకిస్తాన్ జట్ల మధ్య జరిగిన టెస్ట్ సిరీస్‌లు ఎంత ఉత్కంఠగా ఉండేవో అక్రమ్ గుర్తుచేసుకున్నారు.
Also Read: Dream11: బీసీసీఐ సంచలన నిర్ణయం: డ్రీమ్‌11తో స్పాన్సర్‌షిప్ రద్దు
ఆ సిరీస్‌లు రెండు దేశాల మధ్య సంబంధాలను మెరుగుపరచడంలో కూడా సహాయపడ్డాయన్నారు. ఈ విషయం పూర్తిగా ప్రభుత్వాల పరిధిలో ఉందని, అయితే క్రికెటర్లుగా తాము ఎప్పుడూ ద్వైపాక్షిక సిరీస్‌లను కోరుకుంటామని ఆయన చెప్పారు. పాకిస్తాన్ జట్టు భారత్‌లో పర్యటించడానికి, లేదా భారత జట్టు పాకిస్తాన్‌లో పర్యటించడానికి ఎలాంటి అభ్యంతరాలు ఉండకూడదని ఆయన అభిప్రాయపడ్డారు. ప్రపంచవ్యాప్తంగా ఉన్న క్రికెట్ అభిమానులు ఈ రెండు జట్ల మధ్య ద్వైపాక్షిక సిరీస్‌లను చూడాలని కోరుకుంటున్నారని, ఇది కేవలం క్రికెట్‌కు మాత్రమే కాకుండా ఇరు దేశాల మధ్య సత్సంబంధాలకు కూడా దోహదపడుతుందని అక్రమ్ పేర్కొన్నారు. వసీం అక్రమ్ చేసిన ఈ వ్యాఖ్యలు భారత్, పాకిస్తాన్ క్రికెట్ బోర్డులపై మరింత ఒత్తిడిని పెంచే అవకాశం ఉంది. రాబోయే రోజుల్లో ఈ విషయంపై ఇరు దేశాల బోర్డులు ఎలాంటి నిర్ణయం తీసుకుంటాయో చూడాలి.