Delhi: భారతదేశంలో డిజిటల్ చెల్లింపుల విప్లవానికి చిహ్నంగా నిలుస్తున్న యూనిఫైడ్ పేమెంట్స్ ఇంటర్‌ఫేస్ (యూపీఐ) తన ఆధిపత్యాన్ని మరింత బలోపేతం చేసుకుంది. 2025 మొదటి అర్ధభాగంలో యూపీఐ లావాదేవీలు గతేడాదితో పోలిస్తే 35 శాతం వృద్ధి చెందుతూ రూ. 143.34 లక్షల కోట్ల విలువను నమోదు చేశాయి.
‘వరల్డ్‌లైన్‌ ఇండియా డిజిటల్ పేమెంట్స్ రిపోర్ట్‌ (H1 2025)’ ప్రకారం, ఈ ఏడాది జనవరి నుంచి జూన్‌ వరకు 106.36 బిలియన్‌ లావాదేవీలు యూపీఐ ద్వారా జరిగాయి. ఈ సంఖ్య యూపీఐ ప్రజల రోజువారీ జీవితంలో ఎంతగా కలిసిపోయిందో స్పష్టంగా తెలియజేస్తోంది.
🔹 చిన్న లావాదేవీల పెరుగుదల
యూపీఐ వాడకం చిన్న చిన్న కొనుగోళ్లలో వేగంగా పెరగడంతో సగటు లావాదేవీ విలువ తగ్గింది. 2024లో సగటు లావాదేవీ విలువ ₹1,478 ఉండగా,2025లో అదే ₹1,348కి పడిపోయింది.
ఇది టీ కొట్లు, కిరాణా దుకాణాలు, ఆన్‌లైన్‌ షాపింగ్‌ల వంటి చిన్న చెల్లింపుల్లో యూపీఐ వినియోగం విస్తరించిందని సూచిస్తోంది.
🔹 వ్యాపార చెల్లింపుల్లో పెరుగుదల
వ్యక్తి నుంచి వ్యాపారికి (P2M) చేసే లావాదేవీలు 37% పెరిగి 67.01 బిలియన్‌లకు చేరాయి. చిన్న వ్యాపారాలు, కిరాణా దుకాణాలు, సేవల రంగం డిజిటల్ చెల్లింపులకు వెన్నెముకగా నిలుస్తున్నాయని నివేదిక పేర్కొంది.
🔹 మౌలిక సదుపాయాల విస్తరణ
దేశంలో క్యూఆర్ కోడ్‌లు 111% పెరిగి 678 మిలియన్లకు చేరాయి. పాయింట్-ఆఫ్-సేల్‌ (POS) టెర్మినళ్లు 29% పెరిగి 11.2 మిలియన్లకు చేరుకున్నాయి.
🔹 ఇతర చెల్లింపులపై ప్రభావం
యూపీఐ వాడకం పెరగడంతో డెబిట్‌ కార్డుల వినియోగం 8% తగ్గింది, కానీ క్రెడిట్‌ కార్డులు ప్రీమియం ఖర్చులకే పరిమితమవుతున్నాయి. మరోవైపు మొబైల్‌ పేమెంట్స్ 30% వృద్ధితో 98.9 బిలియన్‌ లావాదేవీలు, ₹209.7 ట్రిలియన్ల విలువను నమోదు చేశాయి..