AP News: కాకినాడ కేంద్రంగా సాగుతున్న భారీ సైబర్ మోసానికి పోలీసులు చెక్ పెట్టారు. ‘డిజిటల్ అరెస్ట్’ పేరుతో అమాయకులను భయపెట్టి కోట్లాది రూపాయలు కాజేస్తున్న ఇద్దరు నిందితులను పోలీసులు అరెస్ట్ చేశారు. కాకినాడకు చెందిన సూరంపూడి చంద్రశేఖర్, ఇమంది వెంకట్ నవీన్ అనే వ్యక్తులు ఈ ముఠాలో కీలక పాత్ర పోషిస్తున్నట్లు గుర్తించారు. వీరి వెనుక ఉన్న మరికొంత మంది నిందితుల కోసం పోలీసులు ప్రస్తుతం గాలిస్తున్నారు.
ఈ ముఠా మోసాలు చాలా వింతగా, భయంకరంగా సాగుతున్నాయి. ఇటీవల కాకినాడకు చెందిన ఒక రిటైర్డ్ ఉద్యోగికి వీరు వాట్సాప్ కాల్ చేశారు. “మీరు ఏదో నేరం చేశారు.. మిమ్మల్ని డిజిటల్ అరెస్ట్ చేస్తున్నాం” అని బెదిరించి, ఆయనను గంటల తరబడి ఫోన్లోనే భయాందోళనకు గురిచేశారు. ఆ భయంలోనే సదరు ఉద్యోగి నుంచి ఏకంగా రూ. 59 లక్షలను ఆర్టీజీఎస్ (RTGS) ద్వారా బదిలీ చేయించుకున్నారు. ఇలా ప్రజల భయాన్ని వీరు సొమ్ము చేసుకుంటున్నారు.
వసూలు చేసిన డబ్బును పోలీసులకు చిక్కకుండా ఉండేందుకు నిందితులు చాలా తెలివిగా వ్యవహరించారు. బాధితుల నుంచి వచ్చిన నగదును ముందుగా కొన్ని నకిలీ కంపెనీల ఖాతాల్లోకి మళ్లించారు. ఆ తర్వాత ఆ డబ్బును ‘క్రిప్టో కరెన్సీ’గా మార్చి చివరకు తమ వ్యక్తిగత ఖాతాల్లోకి జమ చేసుకున్నారు. దేశవ్యాప్తంగా దాదాపు 65 సైబర్ కేసుల్లో ఈ ఇద్దరు నిందితుల హస్తం ఉందని, ఇప్పటి వరకు వీరు సుమారు రూ. 8 కోట్లు కాజేసినట్లు పోలీసుల విచారణలో తేలింది.
నిందితుల నుంచి పోలీసులు 5 సెల్ఫోన్లు, 10 డెబిట్ కార్డులు, చెక్ బుక్కులు, పాన్ కార్డులను స్వాధీనం చేసుకున్నారు. ప్రజలు ఇటువంటి ఫేక్ కాల్స్ పట్ల జాగ్రత్తగా ఉండాలని పోలీసులు హెచ్చరిస్తున్నారు. గుర్తుతెలియని వ్యక్తులు ఫోన్ చేసి ‘డిజిటల్ అరెస్ట్’ అని బెదిరిస్తే వెంటనే పోలీసులకు సమాచారం ఇవ్వాలని సూచించారు. ఈ కేసులో పరారీలో ఉన్న మిగిలిన నిందితులను త్వరలోనే పట్టుకుంటామని పోలీసులు ధీమా వ్యక్తం చేశారు.
