Trump: అమెరికా మాజీ అధ్యక్షుడు డొనాల్డ్ ట్రంప్ ఇరాన్‌కు తీవ్ర హెచ్చరికలు జారీ చేశారు. ఇరాన్ తన అణు కార్యక్రమంపై వాషింగ్టన్‌తో ఒప్పందం కుదుర్చుకోకుంటే, బాంబు దాడులు తప్పవని హెచ్చరించారు. ఎన్బీసీ న్యూస్‌కు ఇచ్చిన టెలిఫోన్ ఇంటర్వ్యూలో ట్రంప్ మాట్లాడుతూ, అమెరికా-ఇరాన్ అధికారులు చర్చలు జరుపుతున్నారని తెలిపారు.
ఒప్పందానికి రాకపోతే తీవ్ర పరిణామాలు
“ఒకవేళ ఇరాన్ గనుక ఆ ఒప్పందంపై సంతకం చేయకపోతే తీవ్ర పర్యవసానాలు ఎదుర్కోవాల్సి ఉంటుంది. ఇరాన్‌ను పేల్చివేస్తాం. నేను నాలుగు సంవత్సరాల క్రితం చేసినట్లుగా, వారిపై మరోసారి సుంకాలు విధిస్తాను” అని ట్రంప్ పేర్కొన్నారు.
ఇరాన్, అమెరికా మధ్య కొత్త అణు ఒప్పందం కోసం చర్చలు జరుగుతున్నాయని సమాచారం. అయితే, ట్రంప్ చేసిన హెచ్చరికలను టెహ్రాన్ కొట్టిపారేసింది. ఇరాన్ విదేశాంగ మంత్రి అబ్బాస్ అరాక్‌చి ప్రకారం, ట్రంప్ టెహ్రాన్‌కు లేఖ రాసి కొత్త ఒప్పందం కోసం కోరారని తెలిపారు. దీనికి ఇరాన్ ప్రతిస్పందనను ఒమన్ ద్వారా పంపిందని IRNA వార్తా సంస్థ వెల్లడించింది.
ఇరాన్ అణు కార్యక్రమంపై పశ్చిమ దేశాల ఆరోపణలు
పశ్చిమ దేశాలు చాలా కాలంగా ఇరాన్‌పై ఆరోపణలు చేస్తూనే ఉన్నాయి. యురేనియం అధిక స్థాయిలో శుద్ధి చేయడం ద్వారా అణు ఆయుధ సామర్థ్యాన్ని పెంచేందుకు ఇరాన్ ప్రయత్నిస్తోందని, ఇది పౌర అవసరాల కోసం కాదని అవి చెబుతున్నాయి. అయితే, తమ అణు కార్యక్రమం పూర్తిగా శాంతి ప్రయోజనాల కోసమేనని ఇరాన్ తరచూ వివరణ ఇస్తోంది.