Train Accident: జార్ఖండ్‌లోని సాహిబ్‌గంజ్‌లో రెండు గూడ్స్ రైళ్లు ఎదురెదురుగా ఢీకొన్నాయి. మంగళవారం తెల్లవారుజామున 3 గంటలకు ఈ ప్రమాదం జరిగింది. ఈ ప్రమాదంలో ఇద్దరు లోకో పైలట్లు మరణించారు. అదే సమయంలో, భద్రతలో నిమగ్నమైన నలుగురు CISF సిబ్బంది గాయపడ్డారు.
ప్రత్యక్ష సాక్షులు చెప్పినదాని ప్రకారం ట్రాక్‌పై గూడ్స్ రైలు ఆగి ఉంది. ఇంతలో, అదే ట్రాక్‌పై మరో గూడ్స్ రైలు వచ్చింది. దీని కారణంగా, రెండు రైళ్లు ఎదురెదురుగా ఢీకొన్నాయి.
ప్రమాదంలో మరణించిన ఇద్దరు లోకో పైలట్లలో, అంబుజ్ మహతో బొకారో నివాసి. కాగా, బిఎస్ మాల్ బెంగాల్ నివాసి. గాయపడిన వారు బర్హత్ సదర్ ఆసుపత్రిలో చికిత్స పొందుతున్నారు.
ఢీకొన్న తరువాత, బొగ్గుతో కూడిన గూడ్స్ రైలు మంటల్లో చిక్కుకుంది. అనేక బోగీలు పట్టాలు తప్పాయి.
ఈ సంఘటన గురించి సమాచారం అందిన వెంటనే, అగ్నిమాపక దళం వాహనాలు సంఘటనా స్థలానికి చేరుకుని మంటలను అదుపు చేయడానికి ప్రయత్నించడం ప్రారంభించాయి. సహాయ, రక్షణ పనులు కొనసాగుతున్నాయి.
ఇది కూడా చదవండి: HCU Land Issue: ఆ 400 ఎక‌రాలు మావే.. కాదు మావే.. అని స‌ర్కారు, హెచ్‌సీయూ కీల‌క ప్ర‌క‌ట‌న‌లు
సాహిబ్‌గంజ్ జిల్లాలోని బర్హెట్ ఎంజిఆర్ లైన్‌లో రైలు ప్రమాదం జరిగింది. జార్ఖండ్‌లోని గొడ్డా జిల్లా లాల్మాటియా నుంచి పశ్చిమ బెంగాల్‌లోని ఫరక్కా ఎన్‌టీపీసీకి రైలు వెళ్తోంది. ప్రమాదం జరిగిన లైన్, లాల్మాటియా నుండి ఫరక్కాకు బొగ్గును మోసుకెళ్ళే గూడ్స్ రైళ్లను తీసుకువెళుతుంది.
మానవ తప్పిదమే ఈ ప్రమాదానికి కారణమని భావిస్తున్నారు. అక్కడి మెయిన్ లైన్ సమాచారం లేకుండా మూసివేశారు. ఒక లూప్ లైన్ లో గూడ్స్ అప్పటికే ఆగి ఉంది. రైలు ప్రమాదంలో గాయపడిన అసిస్టెంట్ లోకో పైలట్ జితేంద్ర కుమార్ మాట్లాడుతూ, ‘పాత్రా నుండి రైల్వే లైన్ మార్చారు. 40 కి.మీ. క్రితం బార్హెట్ కంట్రోల్ రూమ్‌తో మాట్లాదినపుడు రైలు ప్రధాన లైన్ గుండానే వెళుతుందని చెప్పారు. 34 కి.మీ తర్వాత కూడా అడిగినప్పుడు, అదే విషయం చెప్పారు. రైలు అక్కడికి చేరుకునేసరికి, మెయిన్ లైన్ క్లోజ్ చేసి ఉంది. లూప్ లైన్ తెరిచి ఉంది. ఆ లైన్ లో అప్పటికే ఒక రైలు నిలబడి ఉంది దీంతో ప్రమాదం జరిగింది అని ఆయన చెప్పారు.