Tirumala: తిరుమల సాలకట్ల బ్రహ్మోత్సవాల్లో అత్యంత ప్రధానమైన గరుడ వాహన సేవ కోసం భక్తులు పోటెత్తడంతో ఆదివారం సాయంత్రం తిరుమల గిరులు జనసంద్రంగా మారాయి. దేశం నలుమూలల నుంచి భక్తులు తరలిరావడంతో అలిపిరి ఘాట్ రోడ్డులో భారీగా ట్రాఫిక్ జామ్ ఏర్పడింది. కార్లు, బస్సులు, ఇతర ప్రైవేట్ వాహనాలు కిలోమీటర్ల మేర కదలకుండా నిలిచిపోవడంతో భక్తులు గంటల తరబడి ఎదురుచూడాల్సి వచ్చింది.
భద్రతా చర్యలు – ఆలస్యానికి కారణం
అలిపిరి టోల్‌గేట్ వద్ద టీటీడీ విజిలెన్స్ అధికారులు, పోలీసులు వాహనాలను క్షుణ్ణంగా తనిఖీ చేసి మాత్రమే పైకి అనుమతిస్తున్నారు. భక్తుల భద్రత కోసం చేపట్టిన ఈ చర్యల వల్ల వాహనాల కదలిక నెమ్మదించినప్పటికీ, స్వామివారి సేవ కోసం భక్తులు ఓపికగా ఎదురుచూస్తున్నారు. ఈ రద్దీని నియంత్రించేందుకు టీటీడీ ప్రత్యేక చర్యలు చేపట్టింది.
నాలుగు మాడ వీధుల్లో భక్తుల సందడి
తిరుమలలోని నాలుగు మాడ వీధులు భక్తులతో కిక్కిరిసిపోయాయి. గరుడ సేవను దగ్గరగా దర్శించేందుకు శనివారం రాత్రి నుంచే వేలాది మంది గ్యాలరీలలో చేరి, రాత్రంతా జాగారం చేశారు. చలిని లెక్క చేయకుండా వేచి ఉన్న వారికి టీటీడీ సిబ్బంది పాలు, బిస్కెట్లు, తాగునీరు అందజేశారు.
టీటీడీ ఏర్పాట్లు
భక్తుల భద్రత, సౌకర్యాన్ని దృష్టిలో ఉంచుకుని టీటీడీ విస్తృత ఏర్పాట్లు చేసింది. ముఖ్యంగా నాలుగు మాడ వీధుల్లో రద్దీని నియంత్రించేందుకు 64 మంది ప్రత్యేక సిబ్బందిని, 14 మంది ప్రత్యేక అధికారులను నియమించింది. ఎలాంటి అవాంఛనీయ ఘటనలు జరగకుండా పటిష్ట భద్రతా చర్యలు అమల్లో ఉన్నాయని టీటీడీ వర్గాలు వెల్లడించాయి.