Srisailam Laddu Prasadam: శ్రీశైలం లడ్డూ ప్రసాదంలో బొద్దింక.. బయటకొచ్చిన సీసీటీవీ దృశ్యాలు

Srisailam Laddu Prasadam: శ్రీశైలంలోని మల్లికార్జున స్వామి వారి ఆలయంలో లడ్డూ ప్రసాదంలో బొద్దింక (మిడత) కనిపించిందంటూ ఇటీవల కొందరు ఆరోపణలు గుప్పించారు. అయితే ఇది కావాలని చేసిన కుట్రగా గుర్తించి, ఆలయ అధికారులు పోలీసులకు ఫిర్యాదు చేశారు. ఈ ఆరోపణల వెనుక కుట్రకోణం ఉందని ఆలయ ఈవో శ్రీనివాసరావు స్పష్టం చేశారు.

సీసీ టీవీ ఫుటేజ్‌తో నిజాలు బయటకు

ఈ సంఘటనపై ఆలయ అధికారులు సీసీ కెమెరాల ఫుటేజీని పూర్తిగా పరిశీలించారు. విచారణలో ఏమి తేలిందంటే —

• లడ్డూ ప్రసాదాన్ని ముందే కొని బయటకు వెళ్లిన వ్యక్తులు మళ్లీ ఆలయంలోకి వచ్చి ఓ భక్తుడికి కవర్లో లడ్డూ పెట్టారు.

• ఆ లడ్డూలో మిడతను చొప్పించి, అది ఆలయంలోనే ఇచ్చారన్నట్టు నాటకం చేశారు.

• ఈ తతంగాన్ని మొబైల్ ఫోన్లో వీడియో తీసి వెంటనే సోషల్ మీడియాలో పోస్ట్ చేశారు.

ఇది సాదారణం కాదు. ఎందుకంటే ఆలయ ప్రవేశానికి ముందు భక్తుల మొబైల్ ఫోన్లు భద్రపరచాల్సి ఉంటుంది. కానీ, వారు కావాలనే మొబైల్ తీసుకురావడంతో పాటు, ముందుగానే ప్లాన్‌ చేసి ఈ కుట్రను అట్టహాసంగా నడిపారు.

ఇది కూడా చదవండి: Dowry Harassment: 100 సావర్ల బంగారం, 70 లక్షల కారు కొనిచ్చిన మళ్లీ వరకట్న వేధింపులు.. మహిళ మృతి

కావలికి చెందిన వ్యక్తి కుట్రలో కీలకం

ఈ వ్యవహారాన్ని ప్రణాళికాబద్ధంగా చేసిన వ్యక్తిగా కె. శరత్ చంద్ర అనే యువకుడు గుర్తించబడ్డాడు. ఇతను తన మిత్రులతో కలిసి ఆలయ ప్రతిష్టను దెబ్బతీయాలని కుట్ర పన్నాడని అధికారులు చెబుతున్నారు.

ప్రభుత్వం తీవ్రంగా స్పందన

ఈ ఘటనపై ప్రభుత్వం చాలా సీరియస్ అయ్యింది. ఆలయ ప్రతిష్టను కించపరిచేలా కుట్రలు చేసిన వారిని వెంటనే అరెస్ట్ చేయాలని అధికారులను ఆదేశించింది. అంతే కాకుండా, ఈ కుట్ర వెనుక ఎవరున్నారు? ఎవరైనా ప్రోత్సహించారా? అన్నదానిపై కూడా దర్యాప్తు జరిపించాలని స్పష్టం చేసింది.

లడ్డూ తయారీలో పూర్తిస్థాయి నిఘా

శ్రీశైలం ఆలయ లడ్డూ తయారీపై పూర్తి స్థాయిలో జాగ్రత్తలు తీసుకుంటున్నట్టు అధికారులు తెలియజేశారు:

• బూందీ నుంచి లడ్డూ తయారీ వరకూ శుభ్రతకు ప్రాముఖ్యత.

• సిబ్బంది క్యాప్, గ్లౌజులు వేసుకుని పని చేయడం.

• ప్రతి దశ సీసీ టీవీల్లో రికార్డవుతుంది.

• నాణ్యతను నిరంతరం పర్యవేక్షిస్తున్నారు.

భక్తులకు ఆలయ వర్గాల విజ్ఞప్తి

అసత్య ప్రచారాలను నమ్మకండని, స్వామి వారి ప్రసాదం నాణ్యతపై భక్తులు సందేహపడాల్సిన అవసరం లేదని ఆలయ అధికారులు స్పష్టం చేశారు. ఇటువంటి కుట్రలను తీవ్రంగా తీసుకుని చర్యలు తీసుకుంటామని ప్రభుత్వానికి నివేదిక అందించినట్టు ఈవో తెలిపారు.

తెలుగు సినిమా ప్రస్థానం ఈ లింక్ ద్వారా తెలుసుకోవచ్చు