Smriti Mandhana: భారత మహిళల క్రికెట్ జట్టు ఓపెనర్ స్మృతి మంధాన మహిళల వన్డే క్రికెట్‌లో కొత్త చరిత్ర సృష్టించింది. ఒకే క్యాలెండర్ ఇయర్‌లో అత్యధిక పరుగులు చేసిన బ్యాటర్‌గా ఆమె ప్రపంచ రికార్డును తన ఖాతాలో వేసుకుంది. ఐసీసీ మహిళల ప్రపంచ కప్ 2025లో భాగంగా దక్షిణాఫ్రికాతో విశాఖపట్నంలో జరిగిన మ్యాచ్‌లో కేవలం 23 పరుగులు చేసినప్పటికీ, ఈ అరుదైన మైలురాయిని మంధాన అధిగమించింది.
28 ఏళ్ల రికార్డు బద్దలు
దక్షిణాఫ్రికాతో మ్యాచ్‌కు ముందు, మంధాన ఈ రికార్డును చేరుకోవడానికి కేవలం 12 పరుగుల దూరంలో ఉంది. ఈ మ్యాచ్‌లో ఆమె తన స్కోరును 982 పరుగులకు పెంచుకుని, 28 ఏళ్ల క్రితం ఆస్ట్రేలియా దిగ్గజం బెలిండా క్లార్క్ నెలకొల్పిన రికార్డును బద్దలు కొట్టింది.
• స్మృతి మంధాన (భారత్): 982 పరుగులు (2025)
• బెలిండా క్లార్క్ (ఆస్ట్రేలియా): 970 పరుగులు (1997)
Also Read: Richa Ghosh: రిచా ఘోష్ సెంచరీ వృధా… టీమిండియా ఓటమి
మంధాన ఈ ఏడాది ఆడిన 17 వన్డే ఇన్నింగ్స్‌లలో 982 పరుగులు సాధించింది. ఈ ఏడాది ఆమె అద్భుతమైన ఫామ్‌లో ఉంది. సెప్టెంబరులో ఆస్ట్రేలియాతో జరిగిన సిరీస్‌లో రెండు అద్భుతమైన సెంచరీలు చేయడంతో పాటు, ఒకే క్యాలెండర్ ఇయర్‌లో నాలుగు వన్డే సెంచరీలు చేసిన తొలి మహిళా క్రికెటర్‌గా కూడా నిలిచింది.
మరో మైలురాయికి చేరువలో…
ప్రస్తుతం 982 పరుగులతో అగ్రస్థానంలో ఉన్న మంధాన, మరో 18 పరుగులు చేస్తే.. ఒకే క్యాలెండర్ ఇయర్‌లో 1,000 వన్డే పరుగులు పూర్తి చేసిన తొలి మహిళా క్రికెటర్‌గా సరికొత్త చరిత్ర సృష్టించనుంది. ఈ రికార్డును కూడా ఆమె త్వరలోనే సాధిస్తుందని అభిమానులు ఆశాభావం వ్యక్తం చేస్తున్నారు.