Charlapalli Drug Case: హైదరాబాద్‌లో మరోసారి భారీ స్థాయి డ్రగ్స్ రాకెట్ బయటపడింది. చర్లపల్లి డ్రగ్స్ కేసులో ముంబయి క్రైమ్ బ్రాంచ్ మరియు తెలంగాణ నార్కో బ్యూరో సంయుక్తంగా చేసిన దర్యాప్తులో అనేక కీలక విషయాలు వెలుగులోకి వచ్చాయి. ఈ రాకెట్ వెనుక విజయ్ ఓలేటి అనే వ్యక్తి ఉన్నట్లు పోలీసులు గుర్తించారు.
డ్రగ్స్ తయారీ కేంద్రాలు, కోట్ల లావాదేవీలు
విజయ్ ఓలేటి చర్లపల్లి, నాచారం ప్రాంతాల్లో మెపీడ్రిన్ (Mephedrone) అనే డ్రగ్ తయారీ యూనిట్లను ఏర్పాటు చేశాడు. ఈ డ్రగ్స్‌ను భారీ స్థాయిలో తయారు చేసి, అమ్ముతున్నాడు. ఒక్కోసారి ఏకంగా 5 కిలోల డ్రగ్స్ తయారు చేసి, ఒక్కో కిలోను దాదాపు రూ.50 లక్షల ధరకు అమ్ముతున్నట్లు అధికారులు తెలిపారు. ఈ వ్యాపారం ద్వారా విజయ్ కోట్ల రూపాయలు సంపాదించినట్లు దర్యాప్తులో తేలింది.
10 ఏళ్లుగా మాఫియా నెట్‌వర్క్
ఈ డ్రగ్స్ వ్యాపారం కోసం విజయ్ ఒక ప్రత్యేకమైన గ్యాంగ్‌ను ఏర్పాటు చేసుకున్నాడు. హైదరాబాద్‌లోని పలు ప్రాంతాల్లో ఈ నెట్‌వర్క్‌ను విస్తరించి, కస్టమర్లకు డ్రగ్స్‌ను సరఫరా చేశాడు. విజయ్ గ్యాంగ్‌పై ముంబయి క్రైమ్ బ్రాంచ్ పూర్తి ఆధారాలను సేకరించింది. ఈ రాకెట్ దాదాపు 10 ఏళ్లుగా నడుస్తున్నప్పటికీ, కేవలం ఎనిమిది నెలల క్రితం మాత్రమే తెలంగాణ నార్కో బ్యూరో దృష్టికి వచ్చింది.
వెంటనే విచారణ ప్రారంభించిన నార్కో బ్యూరో, విజయ్‌కు నోటీసులు జారీ చేసింది. దీనితో విజయ్ కోర్టును ఆశ్రయించాడు. అయితే, పోలీసులు అతని డ్రగ్స్ నెట్‌వర్క్‌పై దర్యాప్తును మరింత ముమ్మరం చేశారు. ఈ కేసుతో తెలంగాణలో మాదక ద్రవ్యాల మాఫియాపై మరింత కఠినమైన చర్యలు తప్పవని అధికారులు స్పష్టం చేస్తున్నారు.