Rana Naidu Season 2: రెండు సంవత్సరాల క్రితం ప్రేక్షకుల ముందుకు వచ్చిన ‘రానా నాయుడు’ వెబ్‌సిరీస్ తన బోల్డ్ కంటెంట్, స్టార్ల సమ్మేళనంతో ఓవైపు ట్రెండింగ్‌లో నిలిచినా, మరోవైపు విమర్శలకు గురైంది. వెంకటేశ్, రానా దగ్గుబాటి వంటి టాలీవుడ్ స్టార్ హీరోలు ఇందులో నటించడంపై చాలా మంది ఆశ్చర్యం వ్యక్తం చేశారు. అయితే, క్రైమ్ థ్రిల్లర్‌గా తెరకెక్కిన ఈ సిరీస్‌కు ఓ విభిన్నమైన ఫాలోయింగ్ ఏర్పడింది.
ఈ సిరీస్‌ను ఎక్కువగా యువ ప్రేక్షకులు ఆదరించగా, కథనంలో ఉన్న హింస, బోల్డ్ సీన్లు విమర్శలకు దారితీశాయి. అయినా, సీజన్ 1 చివర్లో ఇచ్చిన క్లూస్ ద్వారా మరో సీజన్ రాబోతుందని స్పష్టమైంది. ఇప్పుడు అదే మాట నిజమవుతూ, ‘రానా నాయుడు’ సీజన్ 2 విడుదలకు సిద్ధమైంది.
నెట్‌ఫ్లిక్స్ వేదికగా జూన్ 13 నుండి ఈ సిరీస్ సీజన్ 2 స్ట్రీమింగ్ కానుంది. తెలుగు, హిందీ, తమిళం, కన్నడ, మలయాళ భాషల్లో ప్రేక్షకులకు అందుబాటులో ఉంటుంది. తాజాగా విడుదలైన ట్రైలర్‌లో బోల్డ్ కంటెంట్ కంటే యాక్షన్, థ్రిల్‌కు ఎక్కువ ప్రాధాన్యత ఇచ్చినట్టు కనిపిస్తోంది.
Rana Naidu Season 2: ఈ సారి దర్శకులు కరణ్ అన్‌షుమాన్, సుపర్ణ్ వర్మ, అభయ్ చోప్రా కలిసి పని చేశారు. ఈ సీజన్‌లో అర్జున్ రాంపాల్, సుర్వీన్ చావ్లా, కృతి ఖర్బంద, సుశాంత్ సింగ్, అభిషేక్ బెనర్జీ, డినో మోరియా తదితరులు కీలక పాత్రలు పోషించారు. నిర్మాణ బాధ్యతలు సుందర్ ఆరోన్, లోకోమోటివ్ గ్లోబల్ మీడియా చేపట్టాయి.
తొలి సీజన్ తర్వాత వచ్చిన అభ్యంతరాల నేపథ్యంలో ఈసారి అభ్యంతరకర సన్నివేశాలు తగ్గించే ప్రయత్నం చేసినట్టు వెంకటేశ్ ఇటీవల ఓ ఇంటర్వ్యూలో తెలిపారు. ఇప్పుడు విడుదలైన ట్రైలర్‌ను బట్టి చూస్తే నిజంగా అదే దిశగా మార్పులు చేసినట్టు స్పష్టమవుతోంది. అయితే, యాక్షన్, సస్పెన్స్ పరంగా మాత్రం సీజన్ 1 కంటే చాలా అధిక స్థాయిలో మిళితమైనట్లు కనిపిస్తోంది.
‘రానా నాయుడు’ సీజన్ 2 చూసేందుకు అభిమానులు ఎంతో ఆసక్తిగా ఎదురుచూస్తున్నారు. జూన్ 13 నుంచి ఈ క్రైమ్ థ్రిల్లర్ సిరీస్ మళ్లీ ఓటీటీ ప్రపంచంలో హైలైట్ కావడం ఖాయం.