Satya Kumar Yadav: వైద్య ఆరోగ్య శాఖ మంత్రి సత్యకుమార్ యాదవ్ గారు, సర్దార్ వల్లభాయ్ పటేల్ 150వ జయంతి సందర్భంగా ఏర్పాటు చేసిన సమైక్యతా ర్యాలీని ప్రారంభించారు. ఈ కార్యక్రమంలో ఎమ్మెల్యేలు గళ్ళా మాధవి, నసీర్ అహ్మద్, కలెక్టర్ తమీమ్ అన్సారియా, బీజేపీ రాష్ట్ర ప్రధాన కార్యదర్శి రమేష్ నాయుడు, వల్లూరి జయప్రకాష్ నారాయణ వంటి ముఖ్య నాయకులు పాల్గొన్నారు.
దేశాన్ని ఏకం చేసిన ఉక్కు మనిషి: సర్దార్ పటేల్
ఈ సందర్భంగా మంత్రి సత్యకుమార్ యాదవ్ మాట్లాడుతూ, దేశ స్వాతంత్ర్యం తరువాత ప్రజలంతా ఒక్కటిగా ఉండాలని సర్దార్ వల్లభాయ్ పటేల్ ఎంతో కష్టపడ్డారని గుర్తు చేశారు. ఆయన అప్పట్లో ఉన్న 542 సంస్థానాలను భారత దేశంలో విలీనం చేశారని చెప్పారు. ముఖ్యంగా, హైదరాబాద్ సంస్థానం పాకిస్థాన్‌లో కలవాలని అప్పటి నిజాం ప్రయత్నించగా, దానిని సమర్థవంతమైన నాయకుడు పటేల్ గారు అడ్డుకున్నారని మంత్రి తెలిపారు. పటేల్ ఆశయాలను, ఆయన దేశం కోసం చేసిన త్యాగాలను ప్రతి ఒక్కరూ గుర్తుంచుకోవాలని, అందుకే ఆయన పుట్టిన రోజును జాతీయ సమైక్యతా దినంగా జరుపుకుంటున్నామని పేర్కొన్నారు.
మోడీ లక్ష్యం ‘వికసిత భారత్’
ప్రస్తుత పాలన గురించి మాట్లాడుతూ, ఆంధ్రప్రదేశ్ ముఖ్యమంత్రి చంద్రబాబు నాయుడు గారు సంక్షేమమే లక్ష్యంగా పాలన సాగిస్తున్నారని మంత్రి సత్యకుమార్ తెలిపారు. అదే విధంగా, భారత ప్రధాని నరేంద్ర మోడీ గారు కూడా దేశాన్ని ‘వికసిత్ భారత్’ గా మార్చాలనే గొప్ప లక్ష్యంతో పని చేస్తున్నారని మంత్రి వివరించారు.