Posani Krishna Murali: సీనీనటుడు, దర్శకుడు, నిర్మాత పోసాని కృష్ణమురళి అరెస్ట్ వ్యవహారం తెలుగు సినీ, రాజకీయ వర్గాల్లో సంచలనంగా మారింది. దాదాపు 15 రోజులుగా జైలులో ఉన్న ఆయనకు సంబంధించి పలు కేసుల్లో కోర్టు బెయిల్ మంజూరు చేసినప్పటికీ, ఊహించని విధంగా సీఐడీ అధికారులు పీటీ వారెంట్ జారీ చేయడంతో అతని విడుదలకు అడ్డంకి ఏర్పడింది.
కుల విద్వేష ప్రసంగాల ఆరోపణలపై అన్నమయ్య జిల్లాలో జనసేన నేత ఫిర్యాదు చేయడంతో, పోలీసులు హైదరాబాద్‌లోని గచ్చిబౌలిలోని ఆయన నివాసంలో అరెస్టు చేశారు. వైసీపీ నేతలు ఈ అరెస్ట్‌ను అక్రమమని విమర్శించారు. రైల్వే కోడూరు జైల్లో హాజరుపరిచిన అనంతరం కోర్టు 14 రోజుల రిమాండ్ విధించింది. బెయిల్ కోసం పోసాని తరఫున సీనియర్ న్యాయవాది పోరాడినా, కోర్టు తిరస్కరించింది, తద్వారా ఆయనను రాజంపేట సబ్ జైలుకు తరలించారు.
Also Read: CM Chandrababu: ఏపీ అసెంబ్లీలో విద్యుత్ రంగంపై హాట్ డిబేట్ – సీఎం చంద్రబాబు కీలక వ్యాఖ్యలు
పోసాని కృష్ణమురళిపై పలు ప్రాంతాల్లో కేసులు నమోదవ్వడంతో పోలీసులు ఆయన్ను వివిధ ఏరియాలకు తరలించారు. ఈ క్రమంలో నరసరావుపేట, విజయవాడ భవానీపురం, ఆదోనీ పోలీసుల నుంచి పీటీ వారెంట్లు జారీ అయ్యాయి. అయితే అన్ని కేసుల్లో కోర్టు ఆయనకు బెయిల్ మంజూరు చేసినప్పటికీ, చివరి నిమిషంలో ఏపీ సీఐడీ మరో పీటీ వారెంట్ జారీ చేయడంతో ఆయన విడుదల నిలిచిపోయింది. సీఐడీ అధికారులు కర్నూలు జిల్లా జైలుకు వెళ్లి పోసానిని కోర్టు ముందు హాజరుపరిచారు.
ఈ కేసు పరిణామాలు తెలుగు రాష్ట్రాల్లో తీవ్ర చర్చనీయాంశంగా మారాయి.