BC Reservations: వెనుకబడిన కులాల (బీసీ) రిజర్వేషన్ల విషయంలో రాష్ట్ర ప్రభుత్వ నిర్ణయాన్ని సవాల్ చేస్తూ బుట్టెంగారి మాధవరెడ్డి అనే వ్యక్తి మరోసారి హైకోర్టును ఆశ్రయించారు. ప్రభుత్వం నిన్న జారీ చేసిన 42 శాతం రిజర్వేషన్ల జీవో (ప్రభుత్వ ఉత్తర్వు)ను సవాల్ చేస్తూ ఆయన కొత్త పిటిషన్ దాఖలు చేశారు.
జీవోపై అభ్యంతరం ఎందుకు?
బీసీలకు 42 శాతం రిజర్వేషన్లు కేటాయిస్తూ ప్రభుత్వం నిన్న జీవో (GO) విడుదల చేసింది. ఈ జీవో రాజ్యాంగ నిబంధనలకు విరుద్ధంగా ఉందని, దీనిని రద్దు చేయాలని కోరుతూ మాధవరెడ్డి ఈ పిటిషన్ వేశారు. ఈ పిటిషన్‌ను అత్యవసరంగా విచారించాలని (హౌస్ మోషన్ పిటిషన్) కోరుతూ హైకోర్టు రిజిస్ట్రీకి దరఖాస్తు చేసుకున్నారు. ప్రస్తుతం, రిజిస్ట్రీ ఈ దరఖాస్తును పరిశీలిస్తోంది.
ఇది రెండోసారి…
రిజర్వేషన్ల అంశంపై మాధవరెడ్డి కోర్టుకు రావడం ఇది రెండోసారి. మూడు రోజుల క్రితం, ప్రభుత్వం జీవో ఇవ్వకముందే, కేవలం మీడియాలో వచ్చిన వార్తలను ఆధారంగా చేసుకుని ఆయన మొదట పిటిషన్ వేశారు. అయితే, మీడియా కథనాలను ఆధారంగా చేసుకుని విచారణ జరపలేమని అప్పుడు కోర్టు స్పష్టం చేసింది.
తాజాగా, ప్రభుత్వం అధికారికంగా జీవో జారీ చేయడంతో, దానిని సవాల్ చేస్తూ పిటిషనర్ మరోసారి కోర్టు తలుపు తట్టారు. ఈ కొత్త పిటిషన్‌పై హైకోర్టు ఎప్పుడు విచారణ చేపడుతుందనేది త్వరలో తెలుస్తుంది.