Hyderabad: హైదరాబాద్ శివారు ప్రాంతంలో కలకలం రేపిన మహిళా వేధింపుల కేసును నార్సింగి పోలీసులు చాలా వేగంగా ఛేదించారు. ఆల్కాపూర్ టౌన్షిప్లో ఓ మహిళ పట్ల అత్యంత అసభ్యంగా ప్రవర్తించిన నిందితుడిని పోలీసులు గాలించి మరీ పట్టుకున్నారు. మహిళల భద్రత విషయంలో తాము ఎంత కఠినంగా ఉంటామో పోలీసులు ఈ చర్య ద్వారా మరోసారి నిరూపించారు.
పోలీసులు తెలిపిన వివరాల ప్రకారం.. ఈ నెల 14వ తేదీన ఆల్కాపూర్ టౌన్షిప్లో ఉండే ఒక మహిళ తన చిన్నారిని ప్లే స్కూల్ నుండి తీసుకుని నడుచుకుంటూ ఇంటికి వస్తోంది. ఆ సమయంలో రోడ్డుపై ఒంటరిగా వస్తున్న ఆమెను ఒక వ్యక్తి వెంబడించాడు. అంతటితో ఆగకుండా సడన్గా ఆమె దగ్గరికి వచ్చి, చీదరపుట్టేలా అత్యంత అసభ్యంగా ప్రవర్తించాడు. ఈ ఊహించని ఘటనతో ఆ మహిళ తీవ్ర భయాందోళనకు గురైంది. అయినప్పటికీ ఆమె ఏమాత్రం ధైర్యం కోల్పోకుండా నేరుగా నార్సింగి పోలీస్ స్టేషన్కు వెళ్లి పోలీసులకు ఫిర్యాదు చేసింది.
మహిళపై వేధింపుల కేసు కావడంతో నార్సింగి పోలీసులు వెంటనే రంగంలోకి దిగారు. నిందితుడిని పట్టుకోవడానికి ప్రత్యేక బృందాలను ఏర్పాటు చేశారు. ఘటన జరిగిన ప్రాంతంలోని సీసీటీవీ (CCTV) కెమెరాల ఫుటేజీలను పోలీసులు క్షుణ్ణంగా పరిశీలించారు. సాంకేతిక ఆధారాల సహాయంతో సదరు పోకిరిని ‘వడ్డే నాగరాజు’గా గుర్తించారు. ఆ వెంటనే నిందితుడు ఉన్న చోటుపై దాడి చేసి, అతడిని అదుపులోకి తీసుకుని అరెస్ట్ చేశారు.
పోలీసుల ప్రాథమిక విచారణలో నిందితుడు నాగరాజుకు గతంలో ఎలాంటి క్రిమినల్ రికార్డు లేదని తేలింది. ఈ సందర్భంగా పోలీసులు మాట్లాడుతూ.. నగరంలో, ముఖ్యంగా ఐటీ కారిడార్ మరియు శివారు ప్రాంతాలలో మహిళల రక్షణకు మొదటి ప్రాధాన్యత ఇస్తామని చెప్పారు. మహిళల పట్ల తప్పుగా ప్రవర్తించినా, వేధింపులకు పాల్పడినా చట్టప్రకారం కఠినమైన శిక్షలు తప్పవని, నిందితులు ఎంతటి వారైనా వదిలిపెట్టే ప్రసక్తే లేదని నార్సింగి పోలీసులు గట్టిగా హెచ్చరించారు.