nara lokesh: రాష్ట్రంలో ప్రజాప్రభుత్వం స్థాపనైన తర్వాత ప్రజల్లో మళ్లీ చిరునవ్వు కనిపించిందని మంత్రి నారా లోకేష్ తెలిపారు. టిడిపి-జనసేన కలయిక ప్రభుత్వ పాలనలో సుపరిపాలనకు తొలి అడుగు పడిందని పేర్కొన్నారు. మంత్రి లోకేష్ మాట్లాడుతూ, ప్రభుత్వ సంక్షేమ కార్యక్రమాల అమలులో పారదర్శకత, సమర్థతను చూపించామని అన్నారు. పెన్షన్ల కోసం రూ. 34వేల కోట్లు ఖర్చు చేస్తూ వృద్ధులకు, వికలాంగులకు నిత్యావసర భద్రత కల్పిస్తున్నామన్నారు.
అలాగే, అన్న క్యాంటీన్లు ప్రారంభించి, పేదలకు నాణ్యమైన ఆహారం అందుబాటులోకి తెచ్చామన్నారు. ఉచిత గ్యాస్ పంపిణీ ద్వారా గృహిణుల భారం తేలికపరిచామని చెప్పారు. 16,347 పోస్టుల భర్తీకి మెగా డీఎస్సీ నోటిఫికేషన్ విడుదల చేశామని, నిరుద్యోగ యువతకు ఉద్యోగావకాశాలు కల్పించేందుకు కృషి చేస్తున్నామని చెప్పారు. రైతులకు నష్టాన్ని కలిగించే విధంగా ఉన్న ల్యాండ్ టైటిలింగ్ యాక్ట్‌ను రద్దు చేయడం ద్వారా భూసంబంధిత సమస్యలకు మార్గం సుగమం చేశామని వివరించారు.
పవన్ కళ్యాణ్ నాయకత్వంలో పంచాయతీలకు మంచి రోజులు వచ్చినట్లు పేర్కొంటూ, గ్రామీణ పాలనలో పారదర్శకత తీసుకువచ్చామని తెలిపారు. పొగాకు, మామిడి, మిర్చి రైతుల సమస్యలపై యుద్ధప్రాతిపదికన స్పందించామని పేర్కొన్నారు. విద్యాశాఖ రాజకీయాలకు అతీతంగా ఉండాలనే దిశగా చర్యలు తీసుకుంటున్నామని, విద్యార్థులకు సన్న బియ్యం అందిస్తూ పోషకాహారాన్ని మెరుగుపరిచేందుకు కృషి చేస్తున్నామన్నారు. ఉద్యోగుల సంక్షేమం దృష్టిలో ఉంచుకొని జీవో 117 రద్దు చేసినట్లు వెల్లడించారు. టీచర్ల గౌరవాన్ని కాపాడుతూ ప్రతి నెల ఒకటో తేదీనే జీతాలు అందించేలా చర్యలు చేపట్టామన్నారు.