Telangana Municipalities: తెలంగాణ రాష్ట్రంలోని మున్సిపాలిటీలు, మున్సిపల్ కార్పొరేషన్ల అభివృద్ధి కోసం సీఎం రేవంత్ రెడ్డి ప్రభుత్వం భారీగా రూ.2,780 కోట్ల నిధులను విడుదల చేస్తూ కీలక ఉత్తర్వులు జారీ చేసింది.
అభివృద్ధి పనులకు తక్షణ ఆమోదం
రాష్ట్రవ్యాప్తంగా ఉన్న 138 మున్సిపాలిటీలు, కార్పొరేషన్ల పరిధిలో చేపట్టాల్సిన 2,432 అభివృద్ధి పనులకు ఈ నిధులతో ఆమోదం లభించింది. తెలంగాణ కోర్ అర్బన్ సిటీని మినహాయించి మిగిలిన అన్ని పట్టణాలలో మౌలిక సదుపాయాలను మెరుగుపరచడానికి ఈ నిధులను కేటాయించారు.
‘తెలంగాణ రైజింగ్ విజన్ 2027’లో భాగంగా, గ్రేటర్ హైదరాబాద్ వెలుపల ఉన్న పట్టణ ప్రాంతాలను కూడా గ్రోత్ హబ్‌లుగా తీర్చిదిద్దాలని సీఎం రేవంత్ రెడ్డి లక్ష్యంగా పెట్టుకున్నారు. ఈ లక్ష్యాన్ని చేరుకునే దిశగా ఈ నిర్ణయం తీసుకున్నారు.
Also Read: Telangana Government: రేవంత్ రెడ్డి ప్రభుత్వం కీలక నిర్ణయం .. జాయింట్ కలెక్టర్ పదవి రద్దు!
నిధుల పంపిణీ వివరాలు
ముఖ్యమంత్రి రేవంత్ రెడ్డి ఆదేశాల మేరకు, కొత్తగా ఏర్పడిన మున్సిపాలిటీలు, అలాగే గ్రామాలను విలీనం చేసుకున్న మున్సిపాలిటీలకు ఈ పనుల్లో ప్రాధాన్యత ఇవ్వనున్నారు. నిధుల పంపిణీ కింది విధంగా ఉంది:
కొత్త మున్సిపాలిటీలు/పాత మున్సిపాలిటీలు: ఒక్కోదానికి రూ.15 కోట్లు చొప్పున.
విలీన గ్రామాలున్న మున్సిపాలిటీలు: ఒక్కోదానికి రూ.20 కోట్లు చొప్పున.
కొత్త కార్పొరేషన్లు: ఒక్కోదానికి రూ.30 కోట్లు చొప్పున.
త్వరగా పనులు పూర్తి చేయాలని ఆదేశం
ఈ నిధులను వెంటనే విడుదల చేయాలని, అధికారులు టెండర్లు పిలిచి పనులను వేగవంతంగా మొదలుపెట్టాలని సీఎం రేవంత్ రెడ్డి ఆదేశించారు. వచ్చే ఏడాది మార్చి నాటికి అన్ని పనులను కచ్చితంగా పూర్తి చేయాలని లక్ష్యం నిర్దేశించారు.
ఈ నిధులను ప్రధానంగా అంతర్గత రోడ్ల నిర్మాణం, వర్షపు నీటి డ్రైనేజీ వ్యవస్థలు, మురుగునీటి పారుదల వ్యవస్థ, సరస్సులు/చెరువులలో కాలుష్య నివారణ, డబుల్ బెడ్ రూమ్ గృహ నిర్మాణ ప్రాంతాలలో ప్రాథమిక సౌకర్యాలు, పార్కుల అభివృద్ధి వంటి ప్రాధాన్యత కలిగిన అభివృద్ధి పనుల కోసం వినియోగించనున్నారు. పట్టణ జనాభా పెరుగుతున్న అవసరాలకు అనుగుణంగా ప్రాజెక్టులను చేపట్టాలని మున్సిపల్ శాఖకు సూచించారు.