Chandrababu Naidu: ఆంధ్రప్రదేశ్ ముఖ్యమంత్రి చంద్రబాబు నాయుడు రాష్ట్రంలో విద్యారంగంపై తన దృష్టిని పూర్తిగా కేంద్రీకరించారు. శ్రీకాకుళం జిల్లాలోని భామిని మండలంలో నిర్వహించిన ఒక కార్యక్రమంలో విద్యార్థులు, తల్లిదండ్రులతో ఆయన మాట్లాడారు. విద్యార్థులు, తల్లిదండ్రుల కలయికతోనే విద్యారంగంలో చాలా మార్పులు వస్తాయని ఆయన గట్టిగా నమ్మారు. సభలో ఉన్న యువతను చూసి తనకు ఎంతో శక్తి వచ్చిందని సీఎం సంతోషం వ్యక్తం చేశారు.
ఈ సందర్భంగా ఆయన మన్యం జిల్లా ఆర్థిక పరిస్థితి గురించి ప్రస్తావించారు. మన్యం జిల్లాలో తలసరి ఆదాయం రూ. లక్షా 43 వేలు మాత్రమే ఉందని, పాలకొండ, భామిని వంటి ప్రాంతాల్లో అది ఇంకా తక్కువగా ఉందని తెలిపారు. ఈ ప్రాంత అభివృద్ధికి హామీ ఇస్తూ, జనసేన ఎమ్మెల్యేకు పూర్తి సహకారం అందిస్తామని చెప్పారు. తోటపల్లి కాలువ, లిఫ్ట్ ఇరిగేషన్ పనులను త్వరగా పూర్తి చేస్తామని, అలాగే వంశధార, నాగావళి నదుల అనుసంధానం కూడా చేస్తామని హామీ ఇచ్చారు. యువతరం విజన్ 10 సూత్రాలు పాటించాలని సీఎం సూచించారు.
లోకేష్ లక్ష్యం: విద్యా ప్రమాణాలు పెంచడం
సీఎం చంద్రబాబు తన వ్యక్తిగత విషయాలను పంచుకుంటూ, తన కొడుకు నారా లోకేష్ చిన్నప్పుడు జరిగిన పేరెంట్స్ మీటింగ్లకు తాను ఎప్పుడూ వెళ్లలేదని చెప్పారు. లోకేష్ పుట్టినప్పటికి ఆయన తాత సీఎంగా ఉండేవారని, లోకేష్ బాధ్యతలను తన భార్య భువనేశ్వరి చూసుకున్నారని గుర్తు చేసుకున్నారు. పునాది బలంగా ఉంటేనే భవనం గట్టిగా ఉంటుంది, అలాగే పిల్లలకు చిన్నప్పటి నుంచే సబ్జెక్టులపై పట్టు రావాలని అన్నారు. తన కొడుకును రాజకీయాల్లోకి రావాలని తాను ఎప్పుడూ బలవంతం చేయలేదని స్పష్టం చేశారు. వారికి వ్యాపారాలు ఉన్నప్పటికీ, లోకేష్ స్వయంగా ఆలోచించి “విద్యాశాఖ మంత్రిగా పనిచేస్తా” అని నిర్ణయించుకున్నట్లు తెలిపారు.
విద్యారంగంలో గొప్ప మార్పులు తీసుకురావడం, ఏపీ పిల్లలు దేశంలోనే నంబర్ వన్ స్థానంలో ఉండటం లోకేష్ యొక్క ప్రధాన కోరిక అని ముఖ్యమంత్రి తెలిపారు. లోకేష్ స్టాన్ఫోర్డ్ వంటి అంతర్జాతీయ విశ్వవిద్యాలయంలో చదివారు కాబట్టి, ఇక్కడి పిల్లలు కూడా అలాంటి ఉన్నత స్థాయిలో చదవగలిగేలా లోకేష్ వారిని శిక్షణ ఇవ్వాల్సిన బాధ్యత ఉందన్నారు. ఏపీ విద్యార్థులు కూడా స్టాన్ఫోర్డ్ లాంటి యూనివర్సిటీల్లో చదివేలా చూడాల్సిన బాధ్యత లోకేష్దే అని సీఎం స్పష్టం చేశారు.
భవిష్యత్ పారిశ్రామికవేత్తల తయారీ
విద్యార్థుల భవిష్యత్తు నిర్మాణం కోసం సీఎం కొన్ని ముఖ్యమైన సూచనలు చేశారు. ముఖ్యంగా, 7వ తరగతి నుంచే విద్యార్థులు గ్రూప్గా, వ్యక్తిగతంగా ప్రాజెక్టు వర్కులు చేయాలని కోరారు. ఈ ప్రాజెక్టులే వారి భవిష్యత్తును బలంగా నిర్మిస్తాయని చెప్పారు. పిల్లలు తయారుచేసిన ప్రాజెక్టులను ప్రముఖ పారిశ్రామిక వేత్తలకు చూపిస్తామని, తద్వారా ఆ పిల్లలు భవిష్యత్తులో విజయవంతమైన పారిశ్రామికవేత్తలుగా మారేందుకు మార్గం సుగమం చేస్తామని హామీ ఇచ్చారు.
విదేశీ విద్య అభ్యసించాలనుకునే వారి కోసం ‘కలలకు రెక్కలు’ అనే పథకం ద్వారా పావు శాతం వడ్డీతో విద్యారుణాలు అందిస్తామని ముఖ్యమంత్రి తెలిపారు. చివరగా, రాష్ట్రంలో ఆడపిల్లల భద్రతకు అధిక ప్రాధాన్యత ఇస్తామని, ఆడపిల్లల జోలికి వస్తే ఆ రోజు చివరి రోజే అవుతుందని కఠినంగా హెచ్చరించారు.