Mahesh Kumar goud: కోమటిరెడ్డి బ్రదర్స్ బాహాటంగా మాట్లాడతారు, ఇది కాంగ్రెస్‌లో ఉన్న ప్రజాస్వామ్యానికి నిదర్శనం. మా పార్టీలో కొంత మేర స్వేచ్ఛ ఉంటుంది. కానీ అలాగని ఎవరు రెడ్ లైన్ దాటితే ఉపేక్షించేది లేదు” అని హెచ్చరించారు టీపీసీసీ అధ్యక్షుడు మహేశ్ కుమార్ గౌడ్.
తెలంగాణ విలీన దినోత్సవాన్ని పురస్కరించుకుని తెలంగాణ జాగృతి అధ్యక్షురాలు కల్వకుంట్ల కవిత చేసిన వ్యాఖ్యలు రాజకీయ వర్గాల్లో చర్చనీయాంశమయ్యాయి. కాంగ్రెస్ పార్టీ విలీనంలో ఎలాంటి పాత్ర పోషించలేదని కవిత చేసిన విమర్శలకు టీపీసీసీ అధ్యక్షుడు మహేశ్ కుమార్ గౌడ్ తీవ్రంగా స్పందించారు.
“కవితకు చరిత్ర తెలుసా?”
కవిత వ్యాఖ్యలను తప్పుబడిన మహేశ్ గౌడ్, “కవిత అసలు పుట్టింది ఎప్పుడు? ఆమెకు చరిత్ర తెలుసా? చరిత్ర తెలిసిన తర్వాతే మాట్లాడాలి. కాంగ్రెస్ పార్టీ చేసిన త్యాగాలు, కృషి వలననే తెలంగాణ ఈ స్థాయికి వచ్చింది. కవితకు విలీనం దినోత్సవంతో ఏమాత్రం సంబంధం లేదు” అని ప్రశ్నించారు.
తీన్మార్ మల్లన్న కొత్త పార్టీపై స్పందన
ఎంఎల్సీ తీన్మార్ మల్లన్న స్థాపించిన కొత్త పార్టీపై మహేశ్ గౌడ్ స్పందిస్తూ, “పార్టీలు ఎవరు పెట్టినా స్వాగతం. రాజకీయాల్లో కొత్త శక్తులు రావడం సహజం. బీసీల కోసం పోరాడే నాయకుడిగా తీన్మార్ మల్లన్నను గౌరవిస్తాను” అన్నారు.
అయితే, కాంగ్రెస్‌లో ఆయనపై తీసుకున్న క్రమశిక్షణాత్మక చర్యను సమర్థిస్తూ, “పార్టీ నిర్ణయాలను వ్యతిరేకించడంతోనే మల్లన్నను సస్పెండ్ చేశాం. పార్టీ నియమాలు అందరికీ సమానమే. నిర్ణయాలకు వ్యతిరేకంగా వెళితే తగిన చర్యలు తప్పవు” అని తెలిపారు.
రాజకీయ వర్గాల్లో చర్చ
కవిత–కాంగ్రెస్ మధ్య ఈ మాటల యుద్ధం, తీన్మార్ మల్లన్న కొత్త పార్టీ ప్రభావం వంటి అంశాలు తెలంగాణ రాజకీయాల్లో చర్చనీయాంశంగా మారాయి. ముఖ్యంగా కాంగ్రెస్ పార్టీ రాష్ట్రంలో తన బలాన్ని పెంచుకోవడానికి కసరత్తులు చేస్తుంటే, కవిత చేసిన వ్యాఖ్యలు, మల్లన్న పార్టీ ఆవిష్కరణ కొత్త మలుపు తిప్పినట్లు విశ్లేషకులు భావిస్తున్నారు.