Lakshmi Menon: కొచ్చిలో ఐటీ ఉద్యోగిపై కిడ్నాప్, దాడి కేసులో నటి లక్ష్మీ మేనన్ పేరు వినిపిస్తోంది. ఈ ఘటనతో ఆమె పరారీలో ఉండటం చర్చనీయాంశమైంది.
ఘటన వివరాలు
ఈ నెల 24వ తేదీ రాత్రి లక్ష్మీ మేనన్ తన స్నేహితులతో కలిసి ఓ రెస్టో బార్‌కు వెళ్లారు. అక్కడ మిత్రులతో ఉన్న ఓ ఐటీ ఉద్యోగితో గొడవ జరిగింది. ఆ వాగ్వాదం అక్కడితో ముగియకపోవడంతో, లక్ష్మీ మేనన్ మరియు ఆమె స్నేహితులు ఆ ఉద్యోగిని బలవంతంగా కారులో ఎక్కించి దాడి చేసినట్టు ఆరోపణలు ఉన్నాయి. బూతులు తిట్టి, హింసించిన తర్వాత అతడిని మరో ప్రదేశంలో వదిలేసి వెళ్లిపోయారు.
పోలీసు ఫిర్యాదు – పరారీలో నటి
ఈ ఘటనపై బాధితుడు పోలీసులకు ఫిర్యాదు చేయడంతో కేసు నమోదు అయింది. నిందితుల్లో ఒకరిగా లక్ష్మీ మేనన్ పేరును పోలీసులు వెల్లడించారు. అప్పటి నుంచి ఆమె అజ్ఞాతంలోకి వెళ్లిపోయారు.
హైకోర్టు నుంచి ఊరట
ఇక తనను అరెస్టు చేయవద్దంటూ లక్ష్మీ మేనన్ తరఫున న్యాయవాదులు కోర్టును ఆశ్రయించారు. దీనిపై కేరళ హైకోర్టు ఆమెకు ఊరట కల్పించింది. సెప్టెంబర్ 17 వరకు ముందస్తు బెయిల్ మంజూరు చేసి, ఆ వరకు అరెస్టు చేయరాదని పోలీసులకు ఆదేశించింది.
ప్రస్తుతం లక్ష్మీ మేనన్ ఎక్కడ ఉన్నారన్నది మాత్రం పోలీసులు కనుగొనలేకపోతున్నారు.