Telangana: తెలంగాణలోని ఖమ్మం జిల్లా యువతి, తాళ్లూరి పల్లవి, తన అసాధారణ ప్రతిభతో దేశవ్యాప్తంగా సత్తా చాటింది. ఆర్టిఫిషియల్ ఇంటెలిజెన్స్ (AI) ప్రోగ్రామింగ్‌లో అత్యుత్తమ నైపుణ్యం కనబరిచినందుకు గాను, ఏకంగా ప్రధానమంత్రి నరేంద్ర మోదీ గారి చేతుల మీదుగా ఆమె ప్రతిష్టాత్మక అవార్డును అందుకుంది.
ఏఐ రంగంలో ఆల్‌ ఇండియా టాపర్‌
ఖమ్మం జిల్లా రూరల్ మండలం ఆరెంపుల గ్రామానికి చెందిన పల్లవి, ఆర్టిఫిషియల్ ఇంటెలిజెన్స్ ప్రోగ్రామింగ్ అసిస్టెంట్ (AIPA) విభాగంలో ఆల్‌ ఇండియా ట్రేడ్ టాపర్‌గా నిలిచింది. ఈ గొప్ప విజయాన్ని సాధించినందుకుగాను, ఢిల్లీలోని విజ్ఞాన్ భవన్‌లో జరిగిన కౌశల్ దీక్షాంత్ సమారోహ్ కార్యక్రమంలో ఆమెకు ప్రధాని మోదీ అవార్డును అందించారు.
PM-SETU పథకంలో భాగంగా…
దేశంలోని యువతలో నైపుణ్యాలను (స్కిల్స్) పెంచి, వారికి ఉద్యోగావకాశాలు కల్పించే లక్ష్యంతో కేంద్ర ప్రభుత్వం రూ. 60,000 కోట్లతో ప్రధాన మంత్రి సేతు (PM-SETU) పథకాన్ని ప్రవేశపెట్టింది. ఈ పథకంలో అత్యుత్తమ నైపుణ్యం చూపిన విద్యార్థులకు కేంద్రం ఈ అవార్డులను ఇచ్చింది. ఇందులో భాగంగానే పల్లవికి ఈ గౌరవం దక్కింది.
అభినందనల వెల్లువ
తమ బిడ్డ ఇంతటి గొప్ప విజయాన్ని సాధించడం పట్ల పల్లవి తల్లిదండ్రులు, తాళ్లూరి రవి, అజిత దంపతులు, అపారమైన ఆనందాన్ని వ్యక్తం చేశారు. ఖమ్మం యువతి దేశానికే గర్వకారణంగా నిలవడంతో డిప్యూటీ సీఎం భట్టి విక్రమార్క, మంత్రి పొంగులేటి శ్రీనివాసరెడ్డి సహా జిల్లా నాయకులు, ప్రజలు పల్లవిని మనస్ఫూర్తిగా అభినందించారు. ఏఐ వంటి అత్యాధునిక రంగంలో ఖమ్మం యువతి టాపర్‌గా నిలవడం జిల్లాకే గర్వకారణమని వారు కొనియాడారు.