NTR Jayanthi: నట సార్వభౌముడు, దివంగత ముఖ్యమంత్రి, తెలుగుదేశం పార్టీ వ్యవస్థాపకుడు నందమూరి తారక రామారావు గారి 102వ జయంతి నేడు (మే 28). ఈ సందర్భంగా తెలుగు రాష్ట్రాల్లో ఎన్టీఆర్ జయంతిని ఘనంగా జరుపుకుంటున్నారు. హైదరాబాద్‌లోని ఎన్టీఆర్ ఘాట్ వద్ద ఆయనకు కుటుంబసభ్యులు, సినీనటులు, టీడీపీ నాయకులు, కార్యకర్తలు, అభిమానులు ఘన నివాళులు అర్పిస్తున్నారు.
ఈ ఉదయం ఎన్టీఆర్ మనవళ్లు, ప్రముఖ సినీనటులు ఎన్టీఆర్ (జూనియర్) మరియు కల్యాణ్ రామ్ ఒకే కారులో ఎన్టీఆర్ ఘాట్‌కి చేరుకున్నారు. తాత సమాధి వద్ద పుష్పగుచ్ఛాలు ఉంచి, నమస్కారంతో ఘనంగా నివాళులు అర్పించారు. అనంతరం కాసేపు అక్కడే తాతతో గడిపిన శుభ స్మృతులను గుర్తు చేసుకుంటూ తాత చేసిన సేవలను స్మరించుకున్నారు. ఈ కార్యక్రమం సందర్భంగా ఘాట్ వద్ద భద్రతను పటిష్ఠంగా ఏర్పాటు చేశారు.
నందమూరి కుటుంబం సభ్యులు కూడా వేరువేరు సమయాల్లో ఘాట్‌కు చేరుకుని ఎన్టీఆర్‌కు నివాళులు అర్పించనున్నారు. టీడీపీ కార్యకర్తలు, అభిమానులు పెద్ద ఎత్తున హాజరై, ఎన్టీఆర్ సేవలను కొనియాడుతున్నారు.
ఇకపోతే ఎన్టీఆర్ జయంతి సందర్భంగా ఆంధ్రప్రదేశ్ ప్రభుత్వం కీలక నిర్ణయం తీసుకుంది. ప్రతీ సంవత్సరం మే 28వ తేదీని అధికారికంగా “ఎన్టీఆర్ జయంతి”గా రాష్ట్ర వేడుకల రోజుగా నిర్వహించేందుకు జీవో జారీ చేసింది. ఇది ఎన్టీఆర్ అభిమానులకే కాక, తెలుగు ప్రజలందరికీ గర్వకారణంగా మారింది.
ఇది కూడా చదవండి: Bellamkonda Sai Sreenivas: బెల్లంకొండ సాయి శ్రీనివాస్‌ ‘భైరవం’తో సరికొత్త అధ్యాయం!
ఎన్టీఆర్ జీవితాన్ని ఓ పాఠశాలగా చెప్పుకోవచ్చు. ఒక సాధారణ ఉద్యోగిగా ప్రారంభమై, సూపర్ స్టార్‌గా ఎదిగి, ఆ తర్వాత రాజకీయాల్లోకి ప్రవేశించి ఉమ్మడి ఆంధ్రప్రదేశ్‌కు ముఖ్యమంత్రిగా సేవలందించారు. తెలుగు బాష, సంస్కృతి, గౌరవం కోసం నిస్వార్థంగా పోరాడిన ఆయన సేవలు మరువలేనివి. ఆయన సినీ ప్రస్థానం మాత్రమే కాదు, రాజకీయ జీవితం కూడా ఎంతోమంది యువతకు స్ఫూర్తిదాయకం.
ఈ నేపథ్యంలో, ఈ రోజు తెలుగు రాష్ట్రాల్లో ఎన్నో కార్యక్రమాలు నిర్వహిస్తున్నారు. ఎన్టీఆర్ అభిమాన సంఘాలు, టీడీపీ శాఖలు, స్వచ్ఛంద సంస్థలు సేవా కార్యక్రమాలు చేపడుతున్నాయి. రక్తదాన శిబిరాలు, అన్నదానాలు, పుస్తక పంపిణీలు వంటి కార్యాచరణలతో ఎన్టీఆర్ సేవా పరంపరను కొనసాగిస్తున్నారు.
తెలుగు వారి గర్వకారణమైన ఎన్టీఆర్‌ను ఓ నటుడిగా మాత్రమే కాకుండా, ప్రజాసేవకుడిగా, నాయకుడిగా, ఆత్మగౌరవానికి ప్రతీకగా గుర్తుచేసుకుంటూ ఈ 102వ జయంతిని ఘనంగా నిర్వహించడం తెలుగు సమాజానికి మరింత అర్థవంతమైన ఘట్టం.
Our @tarak9999 Anna & @NANDAMURIKALYAN Anna Today At NTR Ghat. pic.twitter.com/XlReLnzOAO
— Sai Mohan ‘NTR’ (@Sai_Mohan_999) May 28, 2025