Nitish Kumar: బీహార్ అసెంబ్లీ ఎన్నికల నేపథ్యంలో జేడీయూ (JDU) పార్టీలో టికెట్ల పంపిణీ ప్రక్రియ తీవ్ర ఉద్రిక్తతలకు దారి తీసింది. టికెట్ దక్కని అసంతృప్త నేతలు, సిట్టింగ్ ఎమ్మెల్యేలు పార్టీ అధినేత, ముఖ్యమంత్రి నితీష్ కుమార్ నివాసం ముందు ఆందోళనకు దిగుతున్నారు. ఈ రగడలో భాగంగా, జేడీయూ సిట్టింగ్ ఎమ్మెల్యే గోపాల్ మండల్ ముఖ్యమంత్రి నితీష్ కుమార్ నివాసం (ముఖ్యమంత్రి అధికారిక నివాసం) వద్ద ధర్నాకు దిగారు. తన అభ్యర్థిత్వాన్ని ఖరారు చేయకపోవడం పట్ల ఆయన తీవ్ర అసంతృప్తి వ్యక్తం చేశారు. పార్టీలో సీట్ల కేటాయింపు, అభ్యర్థుల ఎంపిక ప్రక్రియ పారదర్శకంగా లేదంటూ ఆయన నిరసన తెలిపారు.
గోపాల్ మండల్ వంటి అసంతృప్త నేతలు బహిరంగంగా నిరసన వ్యక్తం చేయడంతో, జేడీయూలో టికెట్ల పంపిణీపై లోలోపల ఉన్న కలకలం బయటపడింది. తొలి జాబితా విడుదలకు ముందు ముఖ్యమంత్రి నివాసం వద్ద చోటుచేసుకున్న ఈ ఆందోళన బీహార్ రాజకీయాల్లో చర్చనీయాంశంగా మారింది. ఇప్పటికే ఎన్డీఏ కూటమిలోని ఇతర మిత్రపక్షాలతో కలిసి జేడీయూ చెరో 101 సీట్లలో పోటీ చేసేందుకు ఒప్పందం కుదుర్చుకోగా, ఇప్పుడు సొంత పార్టీ నేతల అసంతృప్తి నితీష్ కుమార్‌కు కొత్త తలనొప్పిగా మారింది.
ఇది కూడా చదవండి: TSPSC Group 2: గ్రూప్‌-2 సెలెక్టెడ్ అభ్య‌ర్థుల‌కు గుడ్‌న్యూస్‌.. 18న నియామ‌క‌ప‌త్రాలు
బీహార్ రాష్ట్రంలో జరగనున్న అసెంబ్లీ ఎన్నికల కోసం కేంద్ర ఎన్నికల సంఘం (ECI) పూర్తి షెడ్యూల్‌ను విడుదల చేసింది. మొత్తం 243 అసెంబ్లీ నియోజకవర్గాలకు ఎన్నికలు రెండు దశల్లో జరగనున్నాయి.రాష్ట్రంలో శాసనసభ పదవీకాలం ముగియనున్న నేపథ్యంలో, ఈ ఎన్నికల నిర్వహణ అత్యంత కీలకం కానుంది. ఎన్డీఏ (NDA) కూటమి, మహాఘట్‌బంధన్ కూటమి మధ్యే ప్రధాన పోటీ నెలకొననుంది. మొత్తం 7.42 కోట్ల మంది ఓటర్లు తమ ఓటు హక్కును వినియోగించుకోనున్నారు. ఎన్నికలు సజావుగా, ప్రశాంతంగా జరిగేందుకు పటిష్ఠ భద్రతా ఏర్పాట్లు చేయనున్నట్లు ఎన్నికల సంఘం ప్రకటించింది.