CM Omar Abdullah: జమ్మూకశ్మీర్‌కు పూర్తి రాష్ట్ర హోదా ఇవ్వాల్సిందే..

తీర్మానం ప్రవేశపెట్టిన సందర్భంగా ముఖ్యమంత్రి ఒమర్ అబ్దుల్లా కేంద్ర ప్రభుత్వంపై ఘాటు వ్యాఖ్యలు చేశారు. కేంద్ర ప్రభుత్వం పార్లమెంట్‌లో, సుప్రీంకోర్టులో, బహిరంగ సభల్లో జమ్మూకశ్మీర్ ప్రజలకు మూడు దశల హామీ ఇచ్చిందని ఆయన గుర్తుచేశారు. మొదటిది డీలిమిటేషన్, రెండోది ఎన్నికలు, మూడోది రాష్ట్ర హోదా పునరుద్ధరణ.

డీలిమిటేషన్ పూర్తయింది.. ఎన్నికలు కూడా అత్యంత శాంతియుతంగా, భారీ ఓటింగ్ శాతంతో ముగిశాయి. ఎన్నికల తర్వాత తమకు తిరిగి రాష్ట్ర హోదా దక్కుతుందనే బలమైన ఆశతోనే ప్రజలు పెద్ద ఎత్తున ఓట్లేశారని, ఒక్క ఫిర్యాదు కూడా లేకుండా ప్రజాస్వామ్య ప్రక్రియ విజయవంతమైందని సీఎం పేర్కొన్నారు.

ప్రధానమంత్రి నరేంద్ర మోదీ స్వయంగా ప్రసంగిస్తూ ఇది సాధారణ హామీ కాదని, ‘మోదీ గ్యారెంటీ’ అని ప్రకటించారని ఒమర్ గుర్తుచేశారు. మరి ఆ హామీని ఎందుకు అమలు చేయడం లేదని కేంద్రాన్ని ప్రశ్నించారు. ఈ తీర్మానం ద్వారా కేంద్రానికి ఆ మాటను గుర్తుచేస్తున్నామని చెప్పారు.

జమ్మూకశ్మీర్ స్వయంప్రతిపత్తి, హోదాపై గతంలోనూ సభ నిర్ణయాలు తీసుకున్న విషయాన్ని ఒమర్ అబ్దుల్లా తీర్మానంలో పేర్కొన్నారు.

రాష్ట్ర హోదా లేకపోవడం వల్ల జమ్మూకశ్మీర్ తీవ్రంగా నష్టపోతోందని ఒమర్ ఆవేదన వ్యక్తం చేశారు. ఇది అధికార పక్షానికో, ప్రతిపక్షానికో సంబంధించిన విషయం కాదని.. జమ్మూకశ్మీర్ సమగ్ర భవిష్యత్తుకు సంబంధించిన అంశమని స్పష్టం చేశారు. బయట మాట్లాడటం కంటే అసెంబ్లీ వేదికగానే దీనిపై చర్చ జరగాలని, జరుగుతున్న సమావేశాల్లోనే దీనిపై సమగ్ర చర్చకు సమయం కేటాయించాలని స్పీకర్‌ను కోరారు.