Ponnam Prabhakar: సిద్దిపేట జిల్లాలోని హుస్నాబాద్‌లో శ్రీ రేణుక ఎల్లమ్మ ఆలయాన్ని దర్శించుకున్న మంత్రి పొన్నం ప్రభాకర్, విదేశాల్లో ఉన్న తెలంగాణ ప్రజలు తమ సొంత రాష్ట్రంలో పెట్టుబడులు పెట్టాలని కోరారు. ఈ సందర్భంగా ఆయన మాట్లాడుతూ, గ్రామీణ ప్రాంతాలు పారిశ్రామికంగా, సాంకేతికంగా అభివృద్ధి చెందాలని ఆకాంక్షించారు.
విదేశీ పెట్టుబడులు తెలంగాణకు అవసరం
ప్రపంచవ్యాప్తంగా ఉన్న తెలుగు ప్రజలు, ముఖ్యంగా తెలంగాణ మూలాలు ఉన్నవారు రాష్ట్ర అభివృద్ధికి తోడ్పడాలని మంత్రి ప్రభాకర్ పిలుపునిచ్చారు. ప్రస్తుతం విదేశాల్లో అనేకమంది భారతీయ సీఈఓలు పనిచేస్తున్నారని, వారి ప్రతిభను దేశంలో వినియోగించుకోవాలని కోరారు. తెలంగాణ ప్రభుత్వం కొత్త కంపెనీలకు స్వాగతం పలుకుతోందని, వారికి అవసరమైన సహకారం అందిస్తుందని ఆయన తెలిపారు.
అమెరికా దౌత్య సంబంధాలపై ఆందోళన
అంతకుముందు, ఆలయంలో ప్రత్యేక పూజలు చేసిన అనంతరం, అమెరికాతో భారత ప్రభుత్వ దౌత్య సంబంధాలపై ఆయన ఆందోళన వ్యక్తం చేశారు. ప్రస్తుత పరిస్థితుల్లో అమెరికాలో చదువుకోవడానికి, ఉద్యోగాలు చేయడానికి మనవారికి ఇబ్బందులు ఎదురవుతున్నాయని పేర్కొన్నారు.
మంత్రి పొన్నం ప్రభాకర్ హుస్నాబాద్ ఎల్లమ్మ చెరువు కట్ట సుందరీకరణ పనులను, అలాగే సద్దుల బతుకమ్మ ఏర్పాట్లను కూడా పరిశీలించారు.