Rain Alert: ఒడిశా, దక్షిణ ఛత్తీస్‌గఢ్‌ మీదుగా తూర్పు తెలంగాణ వరకు సగటు సముద్ర మట్టం నుండి సుమారు 1.5 కి.మీ ఎత్తులో ద్రోణి కొనసాగుతోంది. ఇదే సమయంలో నైరుతి బంగాళాఖాతంలో ఏర్పడిన ఉపరితల ఆవర్తనం నుంచి తమిళనాడు, రాయలసీమ, దక్షిణ అంతర్గత కర్ణాటక మీదుగా కోస్తా కర్ణాటక వరకు సగటు సముద్ర మట్టం నుండి 3.1 కి.మీ ఎత్తులో మరో ద్రోణి ఏర్పడింది.ఈ రెండు ద్రోణుల ప్రభావంతో రాష్ట్ర వ్యాప్తంగా వాతావరణంలో మార్పులు చోటుచేసుకున్నాయి.
తెలంగాణలో వర్ష సూచన
ఈ రోజు (అక్టోబర్‌ 8) రాష్ట్రంలోని ఆదిలాబాద్, నిర్మల్, నిజామాబాద్, జగిత్యాల, యాదాద్రి భువనగిరి, రంగారెడ్డి, హైదరాబాద్, మేడ్చల్ మల్కాజిగిరి, వికారాబాద్, సంగారెడ్డి, మెదక్, కామారెడ్డి, మహబూబ్ నగర్, నాగర్ కర్నూల్, వనపర్తి, నారాయణపేట, జోగులాంబ గద్వాల్ జిల్లాలలో అక్కడక్కడ మోస్తారు వర్షాలు కురిసే అవకాశం ఉందని హైదరాబాద్ వాతావరణ కేంద్రం వెల్లడించింది.
ఈ నేపథ్యంలో 17 జిల్లాలకు ఎల్లో అలెర్ట్ జారీ చేసింది.
రేపు (అక్టోబర్‌ 9) కూడా రాష్ట్రంలో వర్షాల ప్రభావం కొనసాగనుంది. ముఖ్యంగా కరీంనగర్, పెద్దపల్లి, జయశంకర్ భూపాలపల్లి, ములుగు, భద్రాద్రి కొత్తగూడెం, ఖమ్మం, నల్లగొండ, సూర్యాపేట, మహబూబాబాద్, వరంగల్, హనుమకొండ, జనగాం, సిద్దిపేట, యాదాద్రి భువనగిరి, రంగారెడ్డి, హైదరాబాద్, మేడ్చల్ మల్కాజిగిరి, వికారాబాద్, మహబూబ్ నగర్, నాగర్ కర్నూల్, వనపర్తి, నారాయణపేట, జోగులాంబ గద్వాల్ జిల్లాలలో వర్షాలు కురిసే అవకాశం ఉందని తెలిపింది. ఈ మేరకు 23 జిల్లాలకు ఎల్లో అలెర్ట్ ప్రకటించింది.
ఆంధ్రప్రదేశ్‌లో కూడా వర్షాలు
నైరుతి బంగాళాఖాతంలోని ఆవర్తనం, ద్రోణి ప్రభావంతో ఆంధ్రప్రదేశ్‌ వ్యాప్తంగా మంగళవారం (నిన్న) పలుచోట్ల వర్షాలు కురిశాయి. అత్యధిక వర్షపాతం కోనసీమ జిల్లా ఐ.పోలవరంలో 9.12 సెంటీమీటర్లుగా నమోదైంది.
అదే విధంగా అనకాపల్లి 7.05 సెంటీమీటర్లు, చీపురుపల్లి 6.67 సెంటీమీటర్లు, కోటనందూరు 6.5 సెంటీమీటర్లు వర్షపాతం నమోదయ్యాయి.
రానున్న 24 గంటల్లో రాష్ట్రవ్యాప్తంగా మోస్తరు వర్షాలు కురిసే అవకాశం ఉందని వాతావరణ శాఖ తెలిపింది. అయితే వర్షాలు పడుతున్నప్పటికీ, ఏపీలోని కొంతమంది జిల్లాల్లో ఎండలు మండిపోతున్నాయి. దేశవ్యాప్తంగా నిన్న అత్యధిక ఉష్ణోగ్రతగా నెల్లూరు జిల్లాలో 37.3 డిగ్రీల సెల్సియస్ నమోదైంది.