Home Minister Anitha: ‘మొంథా’ తుపాను ముప్పు నేపథ్యంలో రాష్ట్రంలో ఎలాంటి ప్రాణ, ఆస్తి నష్టం జరగకుండా ముందస్తు చర్యలు చేపట్టాలని హోం మంత్రి వంగలపూడి అనిత అధికారులను ఆదేశించారు. విపత్తుల నిర్వహణ సంస్థ కార్యాలయంలో నిర్వహించిన ఉన్నత స్థాయి సమీక్షలో ఆమె ఈ ఆదేశాలు జారీ చేశారు.
ఆగ్నేయ బంగాళాఖాతంలో కొనసాగుతున్న వాయుగుండం తీవ్ర తుపానుగా మారనుందని, దీని ప్రభావంతో ఈ నెల 27, 28, 29 తేదీల్లో రాష్ట్ర వ్యాప్తంగా తీవ్ర గాలులతో కూడిన భారీ నుంచి అతి భారీ వర్షాలు కురుస్తాయని అధికారులు మంత్రికి పవర్ ప్రజెంటేషన్ ద్వారా వివరించారు. ఈ మేరకు ప్రభావిత జిల్లాల వివరాలను, తుపాను తీవ్రతను అధికారులు మంత్రి దృష్టికి తీసుకొచ్చారు.
Also Read: TDP Bhima for Bus Accident Victims: కార్యకర్తల పార్టీగా మరోసారి నిరూపించుకున్న టీడీపీ
హోం మంత్రి అనిత మాట్లాడుతూ, తుపాను హెచ్చరికల నేపథ్యంలో అన్ని శాఖల అధికారులు అత్యంత అప్రమత్తంగా ఉండాలని సూచించారు. ముఖ్యంగా, తీర ప్రాంత ప్రజలను ముందుగానే అప్రమత్తం చేయాలని, అవసరమైతే లోతట్టు ప్రాంత ప్రజలను సురక్షిత ప్రాంతాలకు తరలించాలని ఆదేశించారు.
మత్స్యకారుల భద్రతకు అత్యధిక ప్రాధాన్యత ఇవ్వాలని, వారు ఏ విధంగానూ సముద్రంలోకి వేటకు వెళ్లకుండా కట్టుదిట్టమైన చర్యలు తీసుకోవాలని అధికారులకు స్పష్టం చేశారు. ఇప్పటికే వేటకు వెళ్లిన మత్స్యకారులను సురక్షిత ప్రాంతాలకు తరలించే ఏర్పాట్లు చేయాలని, వారి బోట్లకు ఎలాంటి ప్రమాదం లేకుండా చూడాలని సూచించారు.
చివరగా, రైతులు కూడా వర్షం కురిసే సమయంలో చెట్ల కింద ఉండొద్దని మంత్రి అనిత ప్రత్యేకంగా పేర్కొన్నారు. మొత్తం మీద, తుపాను పరిస్థితులను ఎదుర్కోవడానికి ప్రభుత్వం సిద్ధంగా ఉందని, అన్ని ముందస్తు జాగ్రత్తలు తీసుకోవాలని అధికారులను ఆదేశించారు.