Rain Alert: బంగాళాఖాతంలో అక్టోబరు 1న మరో అల్పపీడనం ఏర్పడే అవకాశం ఉందని భారత వాతావరణ శాఖ (IMD) సంచలన వార్తను వెల్లడించింది. ఇప్పటికే శనివారం తీరం దాటిన వాయుగుండం ప్రభావంతో తెలుగు రాష్ట్రాలైన ఆంధ్రప్రదేశ్, తెలంగాణలలో భారీ వర్షాలు కురుస్తుండగా, ఈ కొత్త అల్పపీడనం మరింత ప్రమాదకరమైన పరిస్థితికి దారితీయవచ్చని హెచ్చరించింది.
వర్షాలపై తాజా అప్‌డేట్‌:
ఉపరితల ద్రోణి ప్రభావం కారణంగా రెండు తెలుగు రాష్ట్రాల్లోనూ భారీ వర్షాలు కొనసాగుతాయని వాతావరణ శాఖ తెలిపింది.
* ఆదివారం (నేడు), సోమవారం పలు ప్రాంతాల్లో తేలికపాటి నుండి మోస్తరు వర్షాలు, మరికొన్ని చోట్ల భారీ వర్షాలు కురిసే అవకాశం ఉంది.
* మత్స్యకారులకు హెచ్చరిక: రాబోయే బుధవారం వరకు సముద్రంలో వేటకు వెళ్లకూడదని IMD స్పష్టం చేసింది.
తెలంగాణ వాతావరణ నివేదిక
హైదరాబాద్ వాతావరణ శాఖ ఇచ్చిన నివేదిక ప్రకారం:
* నేడు (ఆదివారం) తెలంగాణలో భారీ వర్షాలు కురిసే అవకాశముంది.
* సోమవారం కూడా రాష్ట్రంలో అక్కడక్కడా మోస్తరు నుండి భారీ వర్షాలు నమోదవుతాయి.
* వర్షాలు కురిసే ప్రాంతాలు: ఆదిలాబాద్, నిర్మల్, నిజామాబాద్, వికారాబాద్, సంగారెడ్డి జిల్లాల్లో మోస్తరు వర్షాలు పడతాయి.
* ఈదురు గాలులు: గంటకు 40 నుంచి 50 కి.మీ. వేగంతో ఉరుములు, మెరుపులతో కూడిన ఈదురుగాలులు వీచే అవకాశం ఉంది.
ఆంధ్రప్రదేశ్ వాతావరణ నివేదిక
విపత్తుల నిర్వహణ సంస్థ అందించిన సమాచారం ప్రకారం:
* నేడు (ఆదివారం): ఉత్తరాంధ్రతో పాటు కృష్ణా, ఎన్టీఆర్, గుంటూరు, బాపట్ల జిల్లాల్లో అక్కడక్కడ తేలికపాటి నుండి మోస్తరు వర్షాలు కురిసే ఛాన్స్ ఉంది.
నదుల ఉధృతిపై హెచ్చరిక:
ఎగువ ప్రాంతాల్లో కురుస్తున్న భారీ వర్షాల కారణంగా కృష్ణా, గోదావరి నదులు ఉధృతంగా ప్రవహిస్తున్నాయి.
* కృష్ణానది (ప్రకాశం బ్యారేజి): ఇక్కడ మొదటి ప్రమాద హెచ్చరిక జారీ చేశారు.
* గోదావరి నది (ధవళేశ్వరం): ఇక్కడ కూడా మొదటి ప్రమాద హెచ్చరిక జారీ చేశారు.
నదీ పరీవాహక ప్రాంత ప్రజలు అప్రమత్తంగా ఉండాలని, సురక్షిత ప్రాంతాలకు వెళ్లాలని అధికారులు సూచించారు.