Harish Rao: గోదావరి నదీ యాజమాన్య బోర్డు (GRMB) సమావేశపు ఎజెండాను సవరించాలని తెలంగాణ నీటిపారుదల శాఖ లేఖ రాయడంపై బీఆర్ఎస్ శాసనసభ డిప్యూటీ ఫ్లోర్ లీడర్, మాజీ మంత్రి తన్నీరు హరీశ్రావు తీవ్రస్థాయిలో ధ్వజమెత్తారు. బీఆర్ఎస్ పార్టీ మీడియా వేదికగా నిలదీసిన తర్వాతే కాంగ్రెస్ ప్రభుత్వానికి “సోయి” వచ్చిందా అని ప్రశ్నించారు. తెలంగాణ జల హక్కులను కాపాడటంలో సీఎం రేవంత్ రెడ్డి నేతృత్వంలోని ప్రభుత్వం పూర్తిగా విఫలమైందని మండిపడ్డారు.
చేతులు కాలాక ఆకులు పట్టుకుంటే ఏం లాభం?.. హరీశ్రావు ప్రశ్నలు
తెలంగాణకు చెందిన 7 కీలక ప్రాజెక్టులను నిలుపుదల చేయాలని ఆంధ్రప్రదేశ్ ప్రభుత్వం GRMB ఎజెండాలో ప్రతిపాదనలు పెట్టినప్పుడు తెలంగాణ ప్రభుత్వం ఎందుకు వెంటనే స్పందించలేదని హరీశ్రావు నిలదీశారు..
ఏపీ ప్రభుత్వం మన ప్రాజెక్టులను అడ్డుకునేలా బోర్డు ఎజెండాలో అంశాలు చేర్చితే ఇన్నాళ్లూ నోరు మెదపకుండా ఏం చేస్తున్నారు? మేము ప్రశ్నించిన తర్వాత హడావుడిగా ఉత్తరాలు రాస్తే ప్రయోజనం ఏముంటుంది? చేతులు కాలాక ఆకులు పట్టుకున్నట్లు నామమాత్రపు లేఖలు రాస్తే తెలంగాణ ప్రాజెక్టులు కాపాడబడవు. రేవంత్ రెడ్డి గారూ.. ఇది రాజకీయాల విషయం కాదు, తెలంగాణ భవిష్యత్తు ఇంకా జల హక్కుల సమస్య!— మాజీ మంత్రి హరీశ్రావు
ఎజెండా మార్చకపోతే బోర్డు సమావేశం బహిష్కరించాలి!
రాబోయే ఆగస్టు 18న హైదరాబాద్లో జరగనున్న GRMB సమావేశం విషయంలో తెలంగాణ ప్రభుత్వం గట్టి పట్టుబట్టాలని హరీశ్రావు స్పష్టమైన డిమాండ్లు చేశారు:
-
అంశాల ఉపసంహరణ: ఏపీ ప్రభుత్వం జీఆర్ఎంబీ ఎజెండాలో చేర్చిన తెలంగాణ ప్రాజెక్టుల వ్యతిరేక అంశాలను వెంటనే ఉపసంహరించుకోవాలి.
-
సమావేశం బహిష్కరణ: ఆ ప్రతిపాదనలను ఎజెండా నుంచి తొలగించే వరకు తెలంగాణ ప్రభుత్వం పట్టుబట్టాలని, అవసరమైతే ఆగస్టు 18 నాటి జీఆర్ఎంబీ సమావేశానికి హాజరు కాబోమని కరాఖండిగా తేల్చిచెప్పాలని సూచించారు.
-
ముట్టడి హెచ్చరిక: ఒకవేళ ఆ అభ్యంతరకర ఎజెండాతోనే సమావేశం నిర్వహిస్తే, తెలంగాణ నీటి ప్రయోజనాలను కాపాడుకోవడానికి వేలాది మందితో హైదరాబాద్లోని GRMB కార్యాలయాన్ని ముట్టడిస్తామని హెచ్చరించారు.
కేంద్రం, ఏపీ సీఎం చంద్రబాబు నాయుడు మరియు తెలంగాణ సీఎం రేవంత్ రెడ్డి కలిసి తెలంగాణకు చేస్తున్న జల ద్రోహాన్ని బీఆర్ఎస్ పార్టీ ఊరుకోదని, రాజీలేని పోరాటం చేస్తుందని హరీశ్రావు తేల్చిచెప్పారు.