HARISH RAO: దేశవ్యాప్తంగా సంచలనం రేపిన కంచ గచ్చిబౌలి భూ వివాదం పై సుప్రీం కోర్టు నియమించిన సాధికారిక కమిటీ నేడు హైదరాబాద్ సెంట్రల్ యూనివర్శిటీ (HCU) పరిసర భూముల్లో పరిశీలన చేపట్టింది. ఈ కమిటిని రాష్ట్ర ప్రతిపక్ష నేతలు కలిసి వివరణలు అందించారు.
హరీష్ రావు ఆగ్రహం వ్యక్తం: వాల్టా చట్టానికి తూట్లు
ఈ నేపథ్యంలో బీఆర్ఎస్ ఎమ్మెల్యే, మాజీ మంత్రి హరీష్ రావు మీడియా సమావేశంలో మాట్లాడుతూ, ప్రభుత్వంపై తీవ్ర విమర్శలు చేశారు. ఆయన మాటల్లో: రాష్ట్రంలో వాల్టా చట్టం (WALTA Act) ప్రకారం చెట్లు తొలగించడానికి ముందుగా అనుమతులు తీసుకోవాలి. కానీ రాష్ట్ర ప్రభుత్వం ఎలాంటి అనుమతులు తీసుకోకుండా వేలాది చెట్లు నరికి వేసిందని ఆయన విమర్శించారు.
అంతేకాకుండా, తెలంగాణ ఇండస్ట్రియల్ ఇన్‌ఫ్రాస్ట్రక్చర్ కార్పొరేషన్ (TGIIC) చెట్లు నరుకుతున్నామని స్వయంగా పోలీస్ స్టేషన్‌లో ఫిర్యాదు చేయడం విడ్డూరంగా ఉందన్నారు. అటవీ శాఖ అనుమతి లేకుండా, మూడు రోజుల పాటు భారీ స్థాయిలో చెట్లను నరికిన ఘటనపై ఆయన మండిపడ్డారు.
జింకల మరణం… సీఎం రేవంత్‌పై ప్రశ్నల వర్షం
హరీష్ రావు సంచలన వ్యాఖ్యలు చేస్తూ, బాలీవుడ్ నటుడు సల్మాన్ ఖాన్ ఉదాహరణను గుర్తు చేశారు. “ఒక జింకను చంపినందుకు సల్మాన్ ఖాన్‌ను జైలుకు పంపారు. మరి ఇక్కడ వన్యప్రాంతాల్లో వేల చెట్లు నరికి , అందులో నివసిస్తున్న జింకల ప్రాణాలు పోయినప్పుడు , సీఎం రేవంత్ పై ఎందుకు చర్యలు తీసుకోవడం లేదు?” అని నిలదీశారు.
అలాగే, వన్యప్రాణి సంరక్షణ చట్టం సెక్షన్ 29 (Wild Life Protection Act – Section 29)** ప్రకారం, వన్యప్రాణుల నివాసాల్లో హానికరమైన చర్యలు తీసుకుంటే అది నేరంగా పరిగణించాలన్నారు. “ఇక్కడ మూడు జింకలు చనిపోవడానికి ప్రభుత్వం కారణమవుతే, వారిపై చట్టపరమైన చర్యలు ఎందుకు తీసుకోవడం లేదు?” అని హరీష్ రావు ప్రశ్నించారు.