Hyderabad: హైదరాబాద్: రామంతాపూర్‌లో శ్రీకృష్ణాష్టమి వేడుకల్లో జరిగిన విషాదం మృతుల సంఖ్యను ఆరుకు పెంచింది. ఆదివారం అర్ధరాత్రి జరిగిన ప్రమాదంలో కరెంట్ షాక్‌కు గురై ఐదుగురు అక్కడికక్కడే మరణించగా, తాజాగా మరొకరు ఆసుపత్రిలో చికిత్స పొందుతూ కన్నుమూశారు. దీంతో ఈ ఘటన మొత్తం ఆరు కుటుంబాల్లో తీవ్ర విషాదాన్ని నింపింది.
ఈ నేపథ్యంలో తెలంగాణ ప్రభుత్వం మృతుల కుటుంబాలకు అండగా నిలిచింది. ఒక్కో కుటుంబానికి రూ.5 లక్షల చొప్పున ఎక్స్‌గ్రేషియాను ప్రకటించింది. త్వరలోనే బాధిత కుటుంబాలకు ఈ చెక్కులను అందజేయనున్నట్లు ప్రభుత్వ వర్గాలు తెలిపాయి.
రామంతాపూర్ పరిధిలోని గోఖులే నగర్‌లో శ్రీకృష్ణాష్టమి వేడుకలు జరుగుతున్న సమయంలో ఈ దుర్ఘటన జరిగింది. రథాన్ని లాగుతుండగా విద్యుత్ తీగలు తగిలి ఈ ప్రమాదం సంభవించింది. ఈ ఘటనపై ప్రభుత్వం ఇప్పటికే విచారణకు ఆదేశించింది. భవిష్యత్తులో ఇలాంటి సంఘటనలు పునరావృతం కాకుండా తగిన చర్యలు తీసుకుంటామని హామీ ఇచ్చింది.
ప్రమాదంలో గాయపడిన వారికి మెరుగైన వైద్యం అందిస్తున్నట్లు అధికారులు తెలిపారు. ఈ క్లిష్ట సమయంలో బాధిత కుటుంబాలకు ప్రభుత్వం అన్ని విధాలా అండగా ఉంటుందని భరోసా ఇచ్చారు.