Vizag: ఆంధ్రప్రదేశ్‌లో పెట్టుబడుల జోరు పెరుగుతోంది. ముఖ్యమంత్రి చంద్రబాబు నాయుడు అధ్యక్షతన జరిగిన రాష్ట్ర పెట్టుబడుల ప్రోత్సాహక బోర్డు (ఎస్‌ఐపీబీ) సమావేశంలో రూ.20,000 కోట్లకు పైగా పెట్టుబడులకు ఆమోదం లభించింది. ఈ ప్రాజెక్టుల ద్వారా రాష్ట్రంలో, ముఖ్యంగా విశాఖపట్నంలో 50,000 మందికి పైగా ఉద్యోగావకాశాలు లభించనున్నాయి.
భవిష్యత్ పెట్టుబడులకు అనుగుణంగా విశాఖపట్నం మాస్టర్ ప్లాన్‌ను రూపొందించాలని ముఖ్యమంత్రి చంద్రబాబు అధికారులను ఆదేశించారు. విశాఖకు మరిన్ని ప్రతిష్టాత్మక సంస్థలు వస్తాయని, మౌలిక వసతులకు ఎలాంటి లోటు లేకుండా ప్రణాళికలు అమలు చేయాలని సూచించారు. విశాఖపట్నం ఇమేజ్‌ను ఈ పెట్టుబడులు మరింత పెంచుతాయని మంత్రి నారా లోకేష్ అభిప్రాయపడ్డారు.
Also Read: Bandi vs Eetala War: బండి కంటే ఈటల ఎందులో సీనియర్‌?
ప్రధాన పెట్టుబడులు – ఉద్యోగావకాశాలు:
సిఫీ ఇన్ఫినిట్ స్పేసెస్ లిమిటెడ్: ఈ సంస్థ రాష్ట్రంలో రూ.16,466 కోట్లతో భారీ డేటా సెంటర్‌ను ఏర్పాటు చేయనుంది. దీనిలో విశాఖపట్నంలో మొదటి దశలో రూ.1,466 కోట్ల పెట్టుబడులతో 200 మందికి ఉపాధి లభిస్తుంది. రెండో దశలో రూ.15,000 కోట్ల పెట్టుబడులతో 400 మందికి ఉద్యోగాలు వస్తాయి.
సాత్వా డెవలపర్స్ ప్రైవేట్ లిమిటెడ్: విశాఖపట్నం, మధురవాడలో రూ.1,500 కోట్ల పెట్టుబడులు పెట్టడం ద్వారా 25,000 మందికి ఉద్యోగావకాశాలు కల్పించనుంది.
బీవీఎం ఎనర్జీ అండ్ రెసిడెన్సీ ప్రైవేట్ లిమిటెడ్: విశాఖలోని ఎండాడలో రూ.1,250 కోట్ల పెట్టుబడులతో 15,000 మందికి ఉద్యోగాలు దక్కనున్నాయి.
ఏఎన్ఎస్ఆర్ గ్లోబల్ కార్పొరేషన్ ప్రైవేట్ లిమిటెడ్: ఈ సంస్థ మధురవాడలో రూ.1,000 కోట్ల పెట్టుబడి పెట్టడానికి ముందుకు వచ్చింది. దీని ద్వారా సుమారు 10,000 ఉద్యోగాలు వచ్చే అవకాశం ఉందని మంత్రి నారా లోకేష్ తెలిపారు.
ముఖ్యమంత్రి దృష్టి – భవిష్యత్ ప్రణాళికలు:
విజయవాడ నోవోటెల్‌లో జరిగిన ‘ఇన్వెస్టోపియా గ్లోబల్ ఏపీ – 2025’ సదస్సులో పాల్గొన్న ముఖ్యమంత్రి చంద్రబాబు, సంక్షోభాలను అవకాశాలుగా మార్చుకుంటేనే అభివృద్ధి సాధ్యమని పునరుద్ఘాటించారు. రాష్ట్రంలో పెట్టుబడులకు అనుకూలమైన వాతావరణం ఉందని, అంతర్జాతీయ స్థాయిలో పెట్టుబడిదారులను ఆకర్షించడానికి ప్రభుత్వం కట్టుబడి ఉందని ఆయన స్పష్టం చేశారు. ఈ సమావేశంలో రాష్ట్ర ప్రభుత్వ ప్రధాన కార్యదర్శి, మంత్రులు, వివిధ దేశాల ప్రతినిధులు పాల్గొన్నారు. ఈ భారీ పెట్టుబడులు ఆంధ్రప్రదేశ్ ఆర్థిక వ్యవస్థకు కొత్త ఊపునిస్తాయని, యువతకు ఉపాధి అవకాశాలను మెరుగుపరుస్తాయని అంచనా వేస్తున్నారు.