AP News: ఆంధ్రప్రదేశ్లోని గంగవరం పోర్టు వద్ద నిర్వాసిత మత్స్యకారులు తమ డిమాండ్ల కోసం పెద్ద ఎత్తున ఆందోళన చేపట్టారు. పోర్టు గేటు దగ్గర పెద్ద ధర్నాకు దిగారు. వారికి చెల్లించాల్సిన వన్ టైమ్ సెటిల్మెంట్ డబ్బులు వెంటనే ఇవ్వాలని డిమాండ్ చేస్తూ నిర్వాసిత మత్స్యకార సంఘం ఆధ్వర్యంలో కార్మికులు ఈ నిరసనను మొదలుపెట్టారు.
వారి ప్రధాన డిమాండ్ ఏంటంటే
ప్రతి కార్మికుడికి ఇవ్వాల్సిన రూ. 2 లక్షల బకాయిలను వెంటనే చెల్లించాలి. ఈ ఆందోళన కొద్దిసేపు ఉద్రిక్తతకు దారితీసింది. ధర్నా చేస్తున్న కార్మికులు గేట్లను తోసుకుంటూ పోర్టు లోపలికి వెళ్లడానికి ప్రయత్నించగా, పోలీసులు వారిని అడ్డుకున్నారు. ఈ సమయంలో ఇరువర్గాల మధ్య కొంత తోపులాట జరిగింది.
గంగవరం పోర్టులో మొత్తం 499 మంది కార్మికులకు వన్ టైమ్ సెటిల్మెంట్ కింద ఒక్కొక్కరికి రూ. 2 లక్షలు ఇస్తామని పోర్టు యాజమాన్యం దాదాపు ఒక సంవత్సరం క్రితం ఒప్పందం చేసుకుంది. అయితే, ఈ డబ్బుల చెల్లింపులో ఆలస్యం జరుగుతోందని, పన్నుల రూపంలో డబ్బులు ఖర్చైపోయాయని అధికారులు కారణాలు చెబుతున్నారని కార్మికులు ఆరోపిస్తున్నారు. అందుకే కొద్దిరోజులుగా వారు ఆందోళన చేస్తున్నారు.
ఈ నేపథ్యంలో, సోమవారం కార్మికులంతా ఒక్కసారిగా ఎక్కువ సంఖ్యలో గేటు దగ్గరకు రావడంతో, పోర్టు యాజమాన్యం స్పందించింది. వెంటనే కార్మిక నాయకులను చర్చల కోసం ఆహ్వానించింది. ప్రస్తుతం యాజమాన్యం అధికారులు కార్మిక నాయకులతో వివిధ అంశాలపై చర్చిస్తున్నారు. ఈ చర్చల ద్వారా సమస్య పరిష్కారం అవుతుందని ఆశిస్తున్నారు.