Esha Deol: బాలీవుడ్ నటి ఈషా డియోల్ తన వ్యక్తిగత జీవితం, కెరీర్, సోషల్ మీడియా ట్రోల్స్ గురించి తాజా ఇంటర్వ్యూలో ఆసక్తికర విషయాలు పంచుకున్నారు. ప్రేమ అనేది జీవితంలో అత్యంత అందమైన అనుభూతి అని, సింగిల్‌గా ఉన్నప్పటికీ ప్రేమపై తన నమ్మకం ఎప్పటికీ తగ్గదని ఆమె చెప్పారు. స్టార్ కిడ్స్‌పై సోషల్ మీడియా ట్రోలింగ్‌ను తప్పుపడుతూ, కొత్తగా సినిమా రంగంలోకి వచ్చే వారికి అవకాశం ఇవ్వాలని కోరారు.
ఈషా డియోల్ 2024లో తన భర్త భరత్ తఖ్తానీ నుంచి విడాకులు తీసుకున్న సంగతి తెలిసిందే. 11 సంవత్సరాల వైవాహిక జీవితం తర్వాత విడిపోయిన ఈషా, ప్రస్తుతం సింగిల్‌గా ఉన్నప్పటికీ, ప్రేమ అనేది జీవితంలో అత్యంత అందమైన భావన అని చెప్పారు. ప్రస్తుతం తాను ఎవరితోనూ డేటింగ్ చేయడం లేదని, తన ఇద్దరు కుమార్తెలు రాధ్య (8 సంవత్సరాలు), మిరాయ (6 సంవత్సరాలు)లపై దృష్టి పెడుతున్నానని చెప్పారు. తన మాజీ భర్త భరత్‌తో కలిసి కో-పేరెంటింగ్ చేస్తూ, పిల్లల శ్రేయస్సును ప్రధానంగా భావిస్తున్నట్లు వెల్లడించారు.
సోషల్ మీడియాలో స్టార్ కిడ్స్‌పై జరిగే ట్రోలింగ్ గురించి ఈషా స్పందిస్తూ, ఇది సరైన పద్ధతి కాదని అన్నారు. “నా డెబ్యూ సమయంలో ఇంత ట్రోలింగ్ ఉండేది కాదు. సినీ నటుల పిల్లలు సినిమాల్లోకి రావడం సహజం. వారిని ట్రోల్ చేయడం కంటే, వారికి అవకాశం ఇవ్వాలి అని ఆమె అభిప్రాయపడ్డారు.
Also Read: Nithiin: నితిన్‌కు డబుల్ షాక్!
ఈషా డియోల్ ‘ధూమ్’, ‘యువ’, ‘కాల్’ వంటి సినిమాలతో బాలీవుడ్‌లో మంచి గుర్తింపు తెచ్చుకున్నారు. ఇటీవల ‘తుమ్కో మేరీ కసం’ అనే సినిమాతో మళ్లీ పెద్ద తెరపై కనిపించారు. నేను కమ్‌బ్యాక్ అనే పదాన్ని ఇష్టపడను. నేను ఎప్పుడూ సినీ రంగంలోనే ఉన్నాను. సరైన సమయంలో సరైన ప్రాజెక్టులను ఎంచుకుంటాను, అని ఆమె స్పష్టం చేశారు. నటనతో పాటు నిర్మాణ రంగంలోనూ ఆసక్తి చూపిస్తున్న ఈషా, తన తల్లి హేమమాలినితో కలిసి ‘ఏక్ దుఆ’ అనే షార్ట్ ఫిల్మ్‌ను నిర్మించారు. ఈ చిత్రం 69వ జాతీయ చలనచిత్ర అవార్డుల్లో అవార్డు గెలుచుకుంది. ప్రస్తుతం ఆమె సంజయ్ దత్‌తో కలిసి ఒక కమర్షియల్ ఫిల్మ్, ఒక డాక్యుమెంటరీ ప్రాజెక్ట్‌లో వర్క్ చేస్తున్నారు.
సోషల్ మీడియాపై ఈషా మాట్లాడుతూ, తాను వ్యక్తిగతంగా దాన్ని అంతగా ఇష్టపడనని, కానీ కెరీర్ కోసం దాన్ని ఉపయోగిస్తానని చెప్పారు. ఈ సందర్భంగా ఈషా తల్లి హేమమాలి ఇచ్చిన ఒక సలహా గురించి కూడా పంచుకున్నారు. ప్రేమ, ఆర్థిక స్వాతంత్ర్యం రెండూ ముఖ్యం. ఎప్పుడూ నీ స్వంత గుర్తింపును కలిగి ఉండాలి, అని హేమమాలిని చెప్పిన సలహా ఈషాకు స్ఫూర్తినిచ్చిందని తెలిపారు. తన పిల్లలు సినిమా రంగంలోకి రావాలనుకుంటే, వారి విద్యను పూర్తి చేసిన తర్వాతే ఆ నిర్ణయం తీసుకోవాలని ఆమె కోరుకుంటున్నారు.