Elon musk: ప్రపంచ కుబేరుడు, టెక్నాలజీ దిగ్గజం ఎలన్ మస్క్ మరోసారి సంచలన వ్యాఖ్యలు చేశారు. రాబోయే ఐదేళ్లలో రోబోలు ప్రపంచంలో అత్యుత్తమ శస్త్రచికిత్స నిపుణులుగా మారతాయని మస్క్ అభిప్రాయపడ్డారు.
ప్రస్తుతం ప్రపంచవ్యాప్తంగా ఏఐ (ఆర్టిఫిషియల్ ఇంటెలిజెన్స్‌) విస్తృతంగా పెరుగుతున్న నేపథ్యంలో, ఉద్యోగాలు కోల్పోతారన్న భయాలు వ్యాప్తి చెందుతున్నాయి. ఈ నేపథ్యంలో ఎలన్ మస్క్ చేసిన వ్యాఖ్యలు ప్రాధాన్యం సంతరించుకున్నాయి.
మానవ శరీరానికి మరింత సమీపంగా రోబోలు పని చేయగలగడం ఇప్పుడిప్పుడే సాధ్యమవుతోందని మస్క్ తెలిపారు. ప్రస్తుతం మానవ మెదడులో కంప్యూటర్ ఎలక్ట్రోడ్‌లను అమర్చే ప్రయోగాలు కొనసాగుతున్నాయన్నారు. తన స్వంత కంపెనీ అయిన న్యూరాలింక్ ద్వారా ఈ ప్రయత్నాలు ముమ్మరంగా జరుగుతున్నాయని చెప్పారు.
అదేవిధంగా, ఆపరేషన్లలో రోబోల వాడకం రోజు రోజుకు పెరుగుతోందని మస్క్ పేర్కొన్నారు. రాబోయే రోజుల్లో మానవ తప్పిదాలను తగ్గించేందుకు, వైద్య రంగంలో రోబోలు కీలక పాత్ర పోషించబోతున్నాయని స్పష్టంచేశారు.
ఎలన్ మస్క్ చేసిన ఈ వ్యాఖ్యలు టెక్నాలజీ, వైద్య రంగాలలో భారీ మార్పుల దిశగా సంచలనం సృష్టించాయి.