Etela Rajender: హైదరాబాద్ సెంట్రల్ యూనివర్సిటీ భూముల వేలం (HCU Land Auction) అంశం ప్రస్తుతం తీవ్ర వివాదాస్పదంగా మారింది. యూనివర్సిటీ పరిధిలోని 400 ఎకరాల భూముల వేలం ప్రక్రియ వేగంగా జరుగుతుండగా, విద్యార్థులు, రాజకీయ నాయకులు తీవ్ర ఆందోళన వ్యక్తం చేస్తున్నారు.
వర్సిటీలో ఉద్రిక్త వాతావరణం
హెచ్‌సీయూలో భూముల వేలం కోసం అధికారులు చర్యలు ముమ్మరం చేశారు. యూనివర్సిటీ పరిసరాల్లో భారీగా పోలీసుల మోహరింపు కొనసాగుతోంది. జేసీబీలు, బుల్డోజర్లతో చెట్లు, రాళ్లను తొలగించే పనులు జరుగుతుండటంతో విద్యార్థుల్లో ఆగ్రహం కట్టలు తెంచుకుంది. ఈ నేపథ్యంలో, విద్యార్థులు తీవ్ర నిరసనలు వ్యక్తం చేశారు. భూములను ధ్వంసం చేస్తూ, పచ్చటి వాతావరణాన్ని హననం చేస్తున్నారని వారు ఆరోపిస్తున్నారు.
విద్యార్థుల నిరసన – అరెస్ట్‌లు
నిన్న జరిగిన నిరసనల్లో విద్యార్థులు పెద్ద సంఖ్యలో పాల్గొన్నారు. భూముల వేలాన్ని ఆపాలని డిమాండ్ చేస్తూ నినాదాలు చేశారు. పోలీసులు విద్యార్థులను అడ్డుకోవడంతో తీవ్ర ఘర్షణలు చోటుచేసుకున్నాయి. దీంతో పలువురు విద్యార్థులను పోలీసులు అరెస్ట్ చేశారు. ఈ అరెస్టులను ప్రతిపక్ష పార్టీలు తీవ్రంగా ఖండించాయి.
ఇది కూడా చదవండి: Toll Tax: టోల్‌ రుసుములు తగ్గాయ్.. నేటి అర్ధరాత్రి నుంచే అమల్లోకి
పోలిటికల్ రియాక్షన్ – ఈటల విమర్శలు
ఈ పరిణామాలపై బీజేపీ ఎంపీ ఈటల రాజేందర్ తీవ్రంగా స్పందించారు. విద్యార్థులపై ప్రభుత్వ వైఖరిని తప్పుబడుతూ, ఇది నియంతృత్వ పాలనకు నిదర్శనమన్నారు. తన ట్వీట్‌లో, “విద్యార్థుల నిరసనను అణచివేయాలనుకోవడం దారుణం. ప్రభుత్వానికి కూడా త్వరలోనే కేసీఆర్‌కి ఎదురైన పరిస్థితి ఎదురవ్వొచ్చు,” అని హెచ్చరించారు. కాంగ్రెస్ పార్టీ తక్షణమే స్పందించాలని డిమాండ్ చేశారు. విద్యార్థులకు తాము పూర్తి మద్దతుగా ఉంటామని భరోసా ఇచ్చారు.
మరోసారి పెరగనున్న రాజకీయ వేడి
హెచ్‌సీయూ భూముల వేలం అంశం మరింత దుమారం రేపే అవకాశముంది. విద్యార్థుల ఆందోళనలు, రాజకీయ నేతల వ్యాఖ్యలతో యూనివర్సిటీ పరిసరాల్లో హై టెన్షన్ వాతావరణం కొనసాగుతోంది. భవిష్యత్తులో ఈ వివాదం ఏ మలుపు తిరుగుతుందో చూడాలి.
హైదరాబాద్ సెంట్రల్ యూనివర్సిటీ భూముల వేలంను తీవ్రంగా వ్యతిరేకిస్తున్న. ఆందోళన చేస్తున్న విద్యార్థులపై ఈ ప్రభుత్వం వ్యవహరిస్తున్న తీరు చూస్తుంటే త్వరలోనే వీరికీ కేసీఆర్ కి పట్టిన గతే పడుతుంది. యూనివర్సిటీకి వెళ్లి విద్యార్థులకు అండగా ఉంటామని రాహుల్ గాంధీ చెప్పారు. తక్షణమే రాహుల్…
— Eatala Rajender (@Eatala_Rajender) March 31, 2025