Vikram Bhatt Arrest: ప్రముఖ బాలీవుడ్ దర్శకుడు విక్రమ్ భట్అతని భార్య శ్వేతాంబరి భట్ను రూ. 30 కోట్ల మోసం కేసులో రాజస్థాన్ పోలీసులు ముంబైలో అరెస్ట్ చేశారు. ఉదయ్పూర్లోని ‘ఇందిరా గ్రూప్ ఆఫ్ కంపెనీస్’ యజమాని డాక్టర్ అజయ్ ముర్దియా ఇచ్చిన ఫిర్యాదు మేరకు పోలీసులు ఈ చర్య తీసుకున్నారు. డాక్టర్ అజయ్ ముర్దియా తన దివంగత భార్య జీవిత చరిత్ర ఆధారంగా ఒక చలనచిత్రం (బయోపిక్) తీయడానికి విక్రమ్ భట్ తనను ఒప్పించారని ఫిర్యాదులో పేర్కొన్నారు.
ఈ సినిమా ద్వారా సుమారు రూ. 200 కోట్ల లాభాలు వస్తాయని హామీ ఇచ్చి, విక్రమ్ భట్, శ్వేతాంబరి భట్తో సహా ఎనిమిది మంది కలిసి తన వద్ద నుంచి రూ. 30 కోట్లకు పైగా పెట్టుబడి పెట్టేలా మోసం చేశారని డాక్టర్ ముర్దియా ఆరోపించారు. మెహబూబ్, దినేష్ కటారియా వంటి ఇతరుల పేర్లను కూడా ఫిర్యాదులో ప్రస్తావించారు. ఉదయ్పూర్లోని భూపాల్పురా పోలీస్ స్టేషన్లో ఎఫ్ఐఆర్ నమోదైన ఈ కేసులో, పోలీసులు గతంలో ఆరుగురు నిందితులకు రెండవసారి నోటీసులు జారీ చేశారు. డిసెంబర్ 8వ తేదీలోగా పోలీసుల ఎదుట హాజరు కావాలని ఆదేశించారు. ఈ నేపథ్యంలో, విక్రమ్ భట్, శ్వేతాంబరి భట్లను పోలీసులు అదుపులోకి తీసుకున్నారు.
ఇది కూడా చదవండి: Telangana Global Summit: 3 ట్రిలియన్ డాలర్లు లక్ష్యం.. నేటి నుంచే ‘రైజింగ్ గ్లోబల్ సమ్మిట్’!
అరెస్ట్ తర్వాత వారిద్దరికీ వైద్య పరీక్షలు నిర్వహించారు. ట్రాన్సిట్ రిమాండ్ తీసుకున్న తర్వాత దంపతులను ఉదయ్పూర్కు తరలించనున్నారు. తనపై నమోదైన ఆరోపణలను విక్రమ్ భట్ గతంలో తీవ్రంగా ఖండించారు. తనపై, మరో ఏడుగురిపై ఎఫ్ఐఆర్ నమోదైందని తెలుసుకున్నానని, అయితే తన దృష్టిలో ఇది తప్పుదారి పట్టించేదని, పోలీసులు కూడా తప్పుదోవ పట్టించబడ్డారని అన్నారు. ఈ ఫిర్యాదులో తప్పుడు పత్రాలు ఉండవచ్చని, “పోలీసులను ఒప్పించడానికి ఏదో ఒక నకిలీ పత్రం సృష్టించి ఉండవచ్చు,” అని దర్శకుడు అనుమానం వ్యక్తం చేశారు.
అంతేకాకుండా, తాను రూపొందిస్తున్న ‘విరాట్’ అనే చిత్రాన్ని డాక్టర్ ముర్దియా మధ్యలోనే ఆపివేశారని, సాంకేతిక నిపుణులకు ఇవ్వాల్సిన రూ. 2.5 కోట్ల పెండింగ్ చెల్లింపులు చేయలేదని విక్రమ్ భట్ ఆరోపించారు. ఈ బకాయిలు చెల్లించకుండా తప్పించుకోవడానికి డాక్టర్ ముర్దియా ఈ వ్యూహాన్ని అనుసరిస్తున్నారని ఆయన పేర్కొన్నారు. తాను విచారణకు పూర్తిగా సహకరిస్తానని, తన వద్ద ఉన్న సాక్ష్యాలను పోలీసులకు అందిస్తానని విక్రమ్ భట్ స్పష్టం చేశారు.