Dhanush: కోలీవుడ్ నటుడు ధనుష్, నటి మృణాల్ ఠాకూర్‌ల మధ్య ప్రేమాయణం నడుస్తోందని కొద్ది రోజులుగా సోషల్ మీడియాలో పుకార్లు షికారు చేస్తున్నాయి. అయితే, ఈ వార్తలను ధనుష్, మృణాల్ ఠాకూర్ ఎవరూ ఖండించకపోవడంతో ఈ వార్తలకు మరింత ఆజ్యం పోసినట్లు అయింది. మృణాల్ ఠాకూర్ పుట్టినరోజు వేడుకలు, అలాగే ఆమె నటించిన ‘సన్ ఆఫ్ సర్దార్ 2’ సినిమా ప్రీమియర్‌కు ధనుష్ హాజరయ్యారు.
ఈ సందర్భాల్లో వారిద్దరూ చాలా సన్నిహితంగా కనిపించడం, మాట్లాడుకోవడం వీడియోలు సోషల్ మీడియాలో వైరల్ అయ్యాయి. ఒక వీడియోలో ధనుష్, మృణాల్‌తో చనువుగా మాట్లాడటం, ఆమె చేయి పట్టుకోవడం వంటివి నెటిజన్ల దృష్టిని ఆకర్షించాయి. మృణాల్ ఠాకూర్ తన ఇన్‌స్టాగ్రామ్‌లో ధనుష్ సోదరీమణులను ఫాలో అవ్వడం, అలాగే తన స్పాటిఫై ప్లేలిస్ట్‌లో ధనుష్‌కు ఇష్టమైన పాటలు ఉన్నాయని నెటిజన్లు గుర్తించడం వంటివి ఈ పుకార్లకు మరింత బలం చేకూర్చాయి. ధనుష్ గతంలో రజినీకాంత్ కుమార్తె ఐశ్వర్యతో విడాకులు తీసుకున్న తరువాత, ఆయన వ్యక్తిగత జీవితంపై ఇలాంటి వార్తలు వస్తూనే ఉన్నాయి. దీనిపై అధికారికంగా ప్రకటన వచ్చే వరకు, ఇవన్నీ కేవలం ఊహాగానాలుగానే మిగిలిపోతాయి. కాగా చెన్నైలోని ఫ్యామిలీ వెల్ఫేర్ కోర్టు నవంబర్ 27, 2024న ధనుష్ మరియు ఐశ్వర్య రజినీకాంత్‌లకు అధికారికంగా విడాకులు మంజూరు చేసింది.
ఇది కూడా చదవండి: Kamal Haasan: సనాతన సంకెళ్లపై యుద్ధం.. కమల్ హాసన్ సంచలన వ్యాఖ్యలు!
దీనితో దాదాపు 20 ఏళ్ల వారి వైవాహిక బంధానికి ముగింపు పలికినట్లయింది. ఇద్దరూ పరస్పర అంగీకారంతో విడిపోవాలని నిర్ణయించుకున్నారు. కోర్టు విచారణలో తాము కలిసి ఉండలేమని స్పష్టం చేశారు. ధనుష్ మరియు ఐశ్వర్య 2004లో వివాహం చేసుకున్నారు. వారికి యాత్ర మరియు లింగ అనే ఇద్దరు కుమారులు ఉన్నారు. విడాకుల తర్వాత కూడా ఇద్దరూ తమ పిల్లల బాధ్యతలను కలిసి చూసుకుంటున్నారు. పిల్లలు ప్రస్తుతం ఐశ్వర్యతో ఉంటున్నారు, అయితే ధనుష్ వారితో తరచుగా గడుపుతున్నారు. కొంతకాలం క్రితం ఈ జంట మళ్లీ కలుస్తారన్న పుకార్లు వచ్చాయి. వారి కుటుంబ సభ్యులు, ముఖ్యంగా రజినీకాంత్, వారిని కలపడానికి ప్రయత్నిస్తున్నారని వార్తలు వచ్చాయి. కానీ, కోర్టులో వారు తీసుకున్న నిర్ణయంతో ఈ ఊహాగానాలన్నింటికీ ఫుల్ స్టాప్ పడింది.