Delhi: దేశవ్యాప్తంగా నిబంధనలు పాటించని ప్రైవేట్ యూనివర్సిటీలపై యూజీసీ (University Grants Commission) గట్టిగా చర్యలు ప్రారంభించింది. విద్యార్థులకు, తల్లిదండ్రులకు అవసరమైన కీలక సమాచారాన్ని తమ వెబ్‌సైట్లలో బహిర్గతం చేయకపోవడంతో 54 ప్రైవేట్ యూనివర్సిటీలకు తాజాగా నోటీసులు జారీ చేసింది. ఈ చర్యను ఉన్నత విద్యారంగంలో పారదర్శకత, జవాబుదారీతనం పెంచే కీలక నిర్ణయంగా పరిగణిస్తున్నారు.
యూజీసీ నిబంధనల ప్రకారం, ప్రతి యూనివర్సిటీ తమ వెబ్‌సైట్‌లో అందించే కోర్సులు, ఫ్యాకల్టీ వివరాలు, విద్యార్థుల సంఖ్య, మౌలిక వసతులు, ఆర్థిక వ్యవహారాలు వంటి పూర్తి సమాచారాన్ని స్పష్టంగా ఉంచాలి. ముఖ్యంగా ఈ వివరాలను ఎవరైనా సులభంగా చూడగలగాలి; లాగిన్ లేదా రిజిస్ట్రేషన్ అవసరం లేకూడదు. కానీ ఈ నిబంధనలను 54 యూనివర్సిటీలు పాటించకపోవడంతో, వాటిపై చర్యలు తప్పనిసరి అయ్యాయి.
యూజీసీ ఇప్పటికే పలుమార్లు లేఖలు, ఇ-మెయిళ్లు పంపడంతో పాటు, ఆన్‌లైన్ సమావేశాల్లోనూ ఈ అంశంపై చర్చించినప్పటికీ, ఆయా యూనివర్సిటీల నుంచి తగిన స్పందన రాలేదని స్పష్టం చేసింది. దీంతో యూజీసీ కార్యదర్శి ప్రొఫెసర్ మనీశ్ జోషి నేరుగా లేఖలు పంపి, “విద్యార్థులు, వారి తల్లిదండ్రులు కీలక నిర్ణయాలు తీసుకునే ముందు ఉన్నత విద్యాసంస్థల గురించి పూర్తి, ప్రామాణిక సమాచారాన్ని పొందే హక్కు కలిగి ఉంటారు” అని హెచ్చరించారు.
ఈ జాబితాలో గుజరాత్, హరియాణా, రాజస్థాన్, ఉత్తరప్రదేశ్, కర్ణాటక, మహారాష్ట్ర తదితర రాష్ట్రాల్లోని యూనివర్సిటీలు ఉన్నాయి. కేవలం వెబ్‌సైట్‌లో వివరాలు పెట్టడమే కాకుండా, అదే సమాచారాన్ని యూజీసీకి కూడా సమర్పించాలని ఆదేశించింది.
ఈ చర్యల ద్వారా ఉన్నత విద్యాసంస్థల్లో జవాబుదారీతనం పెంపు, ప్రజల్లో నమ్మకం బలోపేతం చేయడమే తమ లక్ష్యమని యూజీసీ మరోసారి స్పష్టం చేసింది.