Australia: భారత క్రికెట్ దిగ్గజాలు రోహిత్ శర్మ (Ro), విరాట్ కోహ్లీ (Ko)ల పునరాగమనాన్ని గుర్తించే విధంగా జరిగిన భారీ బోర్డర్-గవాస్కర్ టెస్ట్ సిరీస్‌ను నిర్వహించినప్పటికీ, క్రికెట్ ఆస్ట్రేలియా (CA) 2024-25 ఆర్థిక సంవత్సరంలో భారీ నష్టాన్ని ప్రకటించింది. క్రికెట్ ఆస్ట్రేలియా ఈ ఆర్థిక సంవత్సరంలో మొత్తం $7.34 మిలియన్ డాలర్లు (దాదాపు A$11.3 మిలియన్ ఆస్ట్రేలియన్ డాలర్లు) నికర నష్టాన్ని చవిచూసినట్లు వెల్లడించింది. భారత్‌తో జరిగిన ఈ హై-ప్రొఫైల్ ఐదు టెస్టుల సిరీస్ (Ro-Ko కమ్‌బ్యాక్ సిరీస్) ద్వారా, అలాగే కొత్త దేశీయ మీడియా ఒప్పందం ద్వారా CA ఆదాయం గత సంవత్సరం కంటే A$49.2 మిలియన్లు పెరిగి A$453.7 మిలియన్లకు చేరుకుంది.
అయితే, ఈ భారీ ఆదాయం కూడా నష్టాలను పూడ్చలేకపోయింది. సిరీస్ నిర్వహణ, మార్కెటింగ్ ఖర్చులు, జాతీయ జట్ల అంతర్జాతీయ పర్యటనల కోసం అదనంగా 70 రోజుల పాటు నిధులు కేటాయించడం వంటి కారణాల వల్ల నిర్వహణ ఖర్చులు A$24.1 మిలియన్లు పెరిగాయి. ఈ పెరిగిన ఖర్చులే CA నష్టాలకు ప్రధాన కారణమని బోర్డు పేర్కొంది. రికార్డు స్థాయిలో ఆదాయం వచ్చినప్పటికీ, దానిని లాభాలుగా మార్చడంలో బోర్డు విఫలమైందని క్రికెట్ విక్టోరియా (CV) ఛైర్మన్ రాస్ హెప్‌బర్న్ విమర్శించారు.
ఇది కూడా చదవండి: Digital Arrest: సైబర్ నేరగాళ్ల డిజిటల్ అరెస్ట్ .. ముంబై దంపతుల నుంచి రూ. 50 లక్షలు స్వాహా
CA బ్యాలెన్స్ షీట్‌లో వరుసగా నష్టాలు నమోదు కావడం నిరాశపరిచిందని ఆయన అన్నారు. అయినప్పటికీ, CA చీఫ్ ఎగ్జిక్యూటివ్ టాడ్ గ్రీన్‌బర్గ్ రాబోయే ఆర్థిక చక్రంపై ఆశాభావం వ్యక్తం చేశారు. త్వరలో జరగబోయే యాషెస్ సిరీస్ (Ashes Series), భారత్‌తో జరగబోయే వైట్‌-బాల్ సిరీస్‌లు బోర్డుకు భారీ లాభాలను తెచ్చిపెట్టి, మళ్లీ ఆర్థికంగా పటిష్టం చేస్తాయని ఆయన ధీమా వ్యక్తం చేశారు.