Revanth Reddy: హైదరాబాద్లో చెరువులు, ప్రభుత్వ భూముల పరిరక్షణ కోసం తీసుకొచ్చిన ‘హైడ్రా’ (HYDRAA) వ్యవస్థపై తెలంగాణ ముఖ్యమంత్రి రేవంత్ రెడ్డి ఢిల్లీ వేదికగా కీలక వ్యాఖ్యలు చేశారు. కబ్జాదారులు ఎవరైనా సరే వదిలిపెట్టేది లేదని, హైడ్రా పనులను కచ్చితంగా కొనసాగించి తీరుతామని స్పష్టం చేశారు.
1. కబ్జాదారులే హైడ్రా వద్దంటున్నారు
హైడ్రా కార్యకలాపాలపై జరుగుతున్న ప్రచారంపై సీఎం స్పందిస్తూ తీవ్ర స్థాయిలో ధ్వజమెత్తారు. చెరువులు, కుంటలను ఆక్రమించిన బడా బాబులే హైడ్రా వద్దంటూ కోర్టులను తప్పుదోవ పట్టిస్తున్నారు. గండిపేట, బతుకమ్మ కుంటలను ఆక్రమించింది పేదలా? పెద్దలా? గతంలో కూల్చివేసిన ఎన్ కన్వెన్షన్ పేదలదా? అని ప్రశ్నించారు. ఆక్రమణలకు పాల్పడితే పెద్దలైనా, పేదలైనా చట్టం దృష్టిలో ఒక్కటేనని తేల్చి చెప్పారు.
2. అధికారుల నియామకం ప్రభుత్వ విచక్షణ
హైడ్రా కమిషనర్ నియామకంపై వచ్చిన కోర్టు వ్యాఖ్యలపై స్పందిస్తూ.. ఏ అధికారిని ఎక్కడ నియమించాలో నిర్ణయించే పూర్తి విచక్షణ రాష్ట్ర ప్రభుత్వానికి ఉంటుందని తెలిపారు.
గతంలో బీఆర్ఎస్ ప్రభుత్వంలో సోమేష్ కుమార్పై 400కు పైగా కోర్టు ధిక్కరణ కేసులు ఉన్నప్పుడు ఈ నేతలు ఎందుకు మాట్లాడలేదని ప్రశ్నించారు. బీఆర్ఎస్ నేతలు దురుద్దేశంతోనే కేసులు వేసి న్యాయస్థానాలను తప్పుదోవ పట్టించారని ఆరోపించారు.
3. సోషల్ మీడియా దుష్ప్రచారంపై ఆగ్రహం
డబ్బులు ఖర్చు పెట్టి సోషల్ మీడియా వేదికగా హైడ్రాపై తప్పుడు ప్రచారం చేయిస్తున్నారని రేవంత్ రెడ్డి మండిపడ్డారు. భూకబ్జాదారులకు మీడియా సహకరించవద్దని కోరారు. కోర్టు తీర్పు ప్రతిని పరిశీలించిన తర్వాత తదుపరి కార్యాచరణపై పూర్తి స్పష్టతతో ముందుకు వెళ్తామని వెల్లడించారు.