Kalki: రాష్ట్రపతి చేతుల మీదుగా జాతీయ అవార్డులందుకున్న ‘కల్కి 2898 ఏడీ’ టీమ్

సంపూర్ణ వినోదాన్ని అందిస్తూ ప్రేక్షకుల మన్ననలు పొందిన ఉత్తమ చిత్రంగా (Best Popular Film Providing Wholesome Entertainment) ‘కల్కి 2898 ఏడీ’ జాతీయ అవార్డును దక్కించుకుంది. సినిమా  దర్శకుడు నాగ్ అశ్విన్, నిర్మాతలు సి. అశ్విని దత్, స్వప్న దత్ స్వయంగా హాజరై రాష్ట్రపతి చేతుల మీదుగా అవార్డును అందుకున్నారు.

భవిష్యత్ ప్రపంచాన్ని, కాశీ నగరాన్ని అత్యద్భుతంగా డిజైన్ చేసి తెరపై ఆవిష్కరించినందుకు గాను నితిన్ జిహానీ ఉత్తమ ప్రొడక్షన్ డిజైనర్‌గా జాతీయ అవార్డును కైవసం చేసుకున్నారు.

ఈ అరుదైన ఘనతపై ప్రముఖ నిర్మాణ సంస్థ వైజయంతి మూవీస్ తీవ్ర హర్షం వ్యక్తం చేస్తూ ప్రత్యేక ప్రకటన విడుదల చేసింది.. “ఒక సాహసోపేతమైన, భారీ ఆలోచనతో ప్రారంభమైన చిత్రానికి దేశ అత్యున్నత గుర్తింపు దక్కడం మా అందరికీ ఎంతో గర్వకారణం, చెప్పలేనంత ఆనందాన్ని ఇస్తోంది” అని నిర్మాతలు పేర్కొన్నారు. ఇలాంటి ఊహాతీతమైన కాన్సెప్ట్‌ను వెండితెరపై ఆవిష్కరించడం ఒక అద్భుత ప్రయాణమని, నటీనటులు, సాంకేతిక నిపుణుల అంకితభావం, నమ్మకం వల్లే ప్రపంచ స్థాయి సినిమా రూపుదిద్దుకుందని తెలిపారు.

ఈ సందర్భంగా జాతీయ అవార్డుల జ్యూరీకి, ప్రపంచవ్యాప్తంగా ఆదరించిన ప్రేక్షకులకు కృతజ్ఞతలు తెలిపారు. పెద్ద కలలు కనే ప్రయాణంలో ఇది మరొక మైలురాయి అని చెబుతూ.. ఎలాంటి భయాలు లేకుండా కథల హద్దులను దాటుతూ ‘కల్కి’ తదుపరి అధ్యాయాన్ని (Kalki Part 2) అంతకుమించి తీర్చిదిద్దనున్నట్లు స్పష్టం చేశారు.