CM Chandrababu: ఆంధ్రప్రదేశ్ ముఖ్యమంత్రి నారా చంద్రబాబు నాయుడు రాష్ట్ర అభివృద్ధి, స్వచ్ఛతతో పాటు నేర రహిత రాజకీయాలపై కీలక వ్యాఖ్యలు చేశారు. తిరుపతిలో జరిగిన ‘ప్రజావేదిక’ కార్యక్రమంలో పాల్గొన్న ఆయన, రాష్ట్ర భవిష్యత్తుకు సంబంధించిన పలు కీలక అంశాలను వెల్లడించారు. తాను తిరుపతిలో చదువుకుంటూనే ఎమ్మెల్యేగా ఎదిగి, అంచెలంచెలుగా నాలుగు సార్లు ముఖ్యమంత్రి అయిన విషయాన్ని గుర్తుచేసుకున్నారు.
నేర రాజకీయాలకు స్వస్తి పలకాలి
రాష్ట్ర రాజకీయాలు నేరచరిత్ర ఉన్న వ్యక్తులతో కలుషితమయ్యాయని ముఖ్యమంత్రి ఆవేదన వ్యక్తం చేశారు. “ఇంట్లో చెత్తను శుభ్రం చేసినట్లే, నేర రాజకీయాలు చేసేవారిని కూడా క్లీన్ చేయాలి” అని ఆయన పిలుపునిచ్చారు. నేర రాజకీయాలు చేసేవారు ప్రజలకు అవసరం లేదని స్పష్టం చేశారు. రాయలసీమలో గతంలో ఉన్న ముఠాకక్షలు, నక్సలిజం, ఫ్యాక్షనిజం, మతకలహాలపై తాను పోరాడానని గుర్తుచేశారు. నక్సలైట్లు తనను చంపాలని చూసినప్పుడు వెంకటేశ్వర స్వామి తనను కాపాడారని పేర్కొన్నారు. ఎవరైనా హత్య రాజకీయాలు చేయాలని చూస్తే వారిని వదిలిపెట్టే ప్రసక్తే లేదని గట్టిగా హెచ్చరించారు.
మాజీ మంత్రి వైఎస్ వివేకానందరెడ్డి హత్యను గుండెపోటుగా చిత్రీకరించే ప్రయత్నం వైసీపీ నేతలు చేశారని చంద్రబాబు మండిపడ్డారు. “నారాసుర రక్త చరిత్ర” అని తనపై నిందలు వేశారని, తాను మోసపోవడం వల్లే 2019 ఎన్నికల్లో టీడీపీ ఓటమి చెందిందని ఆయన ఆవేదన వ్యక్తం చేశారు. గత పాలకులు రోడ్డుపై మామిడికాయలు పారబోసి “పులివెందుల రాజకీయం” చేశారని దుయ్యబట్టారు.
ప్రజా సంక్షేమం, అభివృద్ధి లక్ష్యంగా కొత్త పథకాలు
గత ఐదేళ్లుగా ప్రజలకు స్వేచ్ఛ, సంతోషం కరువయ్యాయని, ప్రజల ఆరోగ్యాన్ని కూడా లెక్క చేయలేదని, భూములను లాక్కునేందుకు ప్రయత్నించారని చంద్రబాబు విమర్శించారు. రైతులను ఆదుకోవాలనే లక్ష్యంతో టన్ను మామిడికి రూ.12 వేలు (ప్రభుత్వం తరఫున రూ.4 వేలు, కొనుగోలుదారులు రూ.8 వేలు) చెల్లించేలా ఏర్పాట్లు చేశామని వెల్లడించారు.
రాష్ట్రాభివృద్ధికి, ప్రజల సంక్షేమానికి పలు కొత్త కార్యక్రమాలు ప్రకటించారు:
రూ.10 లక్షల కోట్ల విలువైన ప్రాజెక్టులకు ఎంవోయూలు కుదుర్చుకున్నామని, దీని ద్వారా 9 లక్షల మందికి ఉద్యోగ అవకాశాలు లభిస్తాయని చెప్పారు.
యువతకు నిరుద్యోగ భృతి అందిస్తామని హామీ ఇచ్చారు.
ఆగస్టు 15 నుంచి ఆర్టీసీ బస్సుల్లో మహిళలకు ఉచిత ప్రయాణం కల్పిస్తామన్నారు.
పీఎం కిసాన్‌ డబ్బుతోపాటే “అన్నదాత-సుఖీభవ” డబ్బులు కూడా రైతుల ఖాతాల్లో వేస్తామని తెలిపారు.
“తల్లికి వందనం” పథకం కింద ఇంట్లో ఉన్న అందరు పిల్లలకు లబ్ధి చేకూరుస్తామన్నారు.
ఆడబిడ్డలకు 3 ఉచిత గ్యాస్ సిలిండర్లు అందిస్తామని ప్రకటించారు.
Also Read: Kharge: మోదీకి మణిపూర్ కనిపించదేంటీ?
స్వచ్ఛాంధ్ర – స్వర్ణాంధ్ర ఆవశ్యకత
“స్వచ్ఛాంధ్ర-స్వర్ణాంధ్ర” లక్ష్యంతో రాష్ట్రం బాగుండాలంటే అందరూ స్వచ్ఛత పాటించాలని ముఖ్యమంత్రి పిలుపునిచ్చారు. జాతీయ స్థాయిలో ఏపీకి 5 స్వచ్ఛ సర్వేక్షణ్ అవార్డులు రావడం గర్వకారణమన్నారు. ప్లాస్టిక్ వాడకం వల్ల క్యాన్సర్, శ్వాసకోశ వ్యాధులు వచ్చే ప్రమాదం ఉందని హెచ్చరిస్తూ, ప్లాస్టిక్ తగ్గింపుపై చర్యలు చేపడతామని, క్లాత్ బ్యాగ్ వెండింగ్ యంత్రాలను అందుబాటులోకి తెస్తామని చెప్పారు. “ప్రపంచంలో ఏ వస్తువు నిరుపయోగం కాదు, నిరుపయోగంగా ఉన్న వస్తువు నుంచి కూడా సంపద సృష్టించవచ్చు” అని చంద్రబాబు అన్నారు.
అమరావతి – గ్రీన్ హైడ్రోజన్ వ్యాలీ
అమరావతిని “క్వాంటమ్ వ్యాలీ”కి చిరునామాగా మారుస్తామని, అక్కడ ఆర్టిఫిషియల్ ఇంటెలిజెన్స్ (AI)ని అభివృద్ధి చేస్తామని చంద్రబాబు వెల్లడించారు. కాలుష్యం లేకుండా విద్యుత్ ఉత్పత్తి చేసేందుకు “గ్రీన్ హైడ్రోజన్ వ్యాలీ”ని తీసుకురాబోతున్నామని తెలిపారు. ప్రఖ్యాత విద్యాసంస్థలను తిరుపతిలో ఏర్పాటు చేశామని గుర్తు చేసుకున్నారు.
చివరగా, తాను చేసే ప్రతి పని సమాజహితం కోసమే తప్ప వ్యక్తిగత ప్రయోజనం ఉండదని, 2029 నాటికి పేదరికం లేని సమాజాన్ని చూడడమే తన ఆశయమని ముఖ్యమంత్రి చంద్రబాబు నాయుడు స్పష్టం చేశారు. ఆగస్టు 15 నాటికి వాట్సప్ గవర్నెన్స్ ద్వారా 700 ప్రభుత్వ సేవలు అందిస్తామని, వాతావరణ సమాచారం ముందుగా తెలిసేలా యాప్ తీసుకొస్తున్నామని కూడా తెలిపారు.